Եգիպտոսի Վճռաբեկ դատարանը Մուրսիի գործով կրկնակի լսումներ է նշանակել

Եգիպտոսի Վճռաբեկ դատարանը չեղյալ է հայտարարել երկրի նախկին նախագահ Մուհամմեդ Մուրսիի դեմ մահապատժի վճիռը, հայտնում է Reuters–ը։
Դատարանը կարգադրել է կրկնակի լսումներ անցկացնել 20163-ի հուլիսի 3-ին տապալված նախագահ Մուհամմեդ Մուրսիի գործով։

Եգիպտոսում արգելված «Մուսուլման եղբայրներ» շարժման անդամները մեղադրվում են Կահիրեի արվարձանում ոստիկանական բաժանմունքի վրա հարձակման համար, որն իրականացվել էր  2013-ի ամռանը եւ որի արդյունքում 13 մարդ էր զոհվել:

2014-ի հունիսին Եգիպտոսի դատարանը 2013-ի անկարգությունների գործով մահվան դատավճիռ էր կայացրել  «Մուսուլման եղբայրներ» շարժման 183 անդամի նկատմամբ, սակայն հետագայում դատավճիռների զգալի մասը չեղյալ էր համարվել։

Երկրի պաշտոնանկ արված նախագահ եւ «Մուսուլման եղբայրների» առաջնորդ Մուհամմեդ Մուրսին եւս անցյալ տարվա ամռանը մահվան էր դատապարտվել: 

2015-ի ապրիլին քրեական դատարանը Մուրսիիի եւ շարժման մի քանի անդամների 20 տարվա ազատազրկման էր դատապարտել: Դատավորները գործի ֆիգուրանտներին մեղավոր էին ճանաչել «Ալ Իթթիհադիա» նախագահական նստավայրի մոտ բողոքի մասնակիցներին սպանելու մեջ:

Անցյալ տարվա մայիսին Մուրսիին մահվան էին դատապարտել 2011-ին բանտից զանգվածային փախուստ կազմակերպելու համար, իսկ 2016-ի հունիսին Մուրսին ցմահ բանտարկության էր դատապարտվել պետական դավաճանության եւ Կատարի օգտին լրտեսություն անելու համար: