Զինված խմբի «լակմուսը». «Փաստ»
Ուշադրության կենտրոնում
«Փաստ» օրաթերթը գրում է.
Անցյալ տարվա նոյեմբերին ՀՀ ուժայինները Երևանում մեծ շուքով իրականացրեցին, այսպես կոչված զինված խմբի վնասազերծումն ու ձերբակալումը։ Այն ժամանակ, հաշվի առնելով սպասվելիք սահմանադրական փոփոխությունները, գրեթե ոչ ոք չհավատաց այն ամենին, ինչ ներկայացրեց իշխանությունը։ Չենք կարծում, թե հավատացողների թիվն առանձնապես աճել է։ Դեպքից անցել է մեկ տարի, սակայն ԱԱԾ–ն դեռ որևէ հստակ ու հոդաբաշխ տեղեկություն չի տվել զինված խմբի հիմնական նպատակների մասին։ Մեկ լսում ենք լուրեր առ այն, որ նրանք պատրաստվում էին պայթեցնել նախագահի ինքնաթիռը, հաջորդ դրվագում ներկայանում են որպես խիստ հայրենասերներ, որոնք պատրաստվում էին սահման գնալ, երրորդ դրվագում ՝ չէին թողնելու Ղարաբաղ ծախեն։
Ինչևէ, թողնենք այս հակասական տեղեկությունները և գանք բուն թեմային։ ԱԱԾ–ն իր տեղեկություններով իրապես խճճեց հայ հասարակությանը, գործի մեջ ներառելով իսպանահայի, կանանց, կաթոլիկ պաստորի, նախկին փոխնախարարի, ազատամարտիկների և այլն։ Կարել է ասել, հասարակության բոլոր խավերը ներկայացված են այս խմբում կամ խմբի հետ առչնվող գործերում։ Ասել, թե ԱԱԾ–ն անում է դա չգիտակցված, առնվազն ծիծաղելի կլինի։ Գործի շրջանակներում ստեղծվել է իրավիճակային քաոս, իսկ որպես կանոն ՝ քաոսում կառավարում են ուժայինները, դա կլինի ԱԱԾ թե ԿԳԲ, անվանումն էական չէ։ Միայն վերջերս այդ կառույցը հայտարարեց, որ գործում ներգրավված անձանց թիվը հասնում է շուրջ երեք հարյուրի։ Հասարակությունը գիտի նրանցից առավելագույնը տասին։ Բայց քաղաքացու մոտ պարզ հարցադրում է առաջանում, թե ովքեր են այն մնացածները, որոնք կուզենային այս երկրում հեղաշրջում անել և խառնաշփոթ ստեղծել։ Այս ֆոնի վրա, Շիրխանյանի չկայացած ասուլիսի աճպարարությունները և խմբի պարագլխի արդեն իսկ հակասական ցուցմունքները, էլ ավելի հետաքրքիր են դարձնում իրավիճակը։ Ասել կուզե, գործ ունենք խորքային մի մեխանիզմի հետ, որն ԱԱԾ–ն կարող է օգտագործել ինչպես արտաքին ցուցադրության, այնպես էլ ներքին սպառման հետ կապված։ Մեզ սույն դրվագում առավել հետաքրքրական է ներքին սպառումը։ Նախ ծիծաղելի է հատկապես նշվող գումարի չափը, որով Հայր Անտոնը ֆինանսավորել է այսպես ասած զինված խմբին. 70000 դոլլար։ Եթե այդչափ գումարը բավականացներ հեղաշրջում անելու, ապա Հայաստանում, վաղուց արդեն, յուրաքանչյուր երրորդ միջին ձեռնարկատեր մի քանի հեղաշրջումներ արած կլիներ։
Մյուս կողմից, այս գործը դարձել է դագանակ նախկին իշխանավորների կամ իշխանությունից նեղացածների գլխին։ Եթե գործում ներգրավվել է 300 մարդ, ապա նրանցից յուրաքանչուրը կարող է ցուցմունք տալ ինչ–որ նախկին կամ ներկա պաշտոնյայի անունը շրջանառելով։ Այստեղ էական չէ արդեն, թե այդ նախկինն ու ներկան կապ ունե՚՞ն, թե ոչ։ Էականը դրվագի էֆեկտն է, և այդ անձին նախազգուշացնելը։ Այսպես եղավ նախկին ՊՆ նախարար Սեյրան Օհանյանի դեպքում։ Լրատվամիջոցներին, չգիտես որտեղից հասանելի դարձավ նախաքննական գաղտնիք, որի կերտմանը մասնակցում էին երեք անձ ՝ քննիչը, Շիրխանյանը և Հայր Անտոնը։ Եթե վերջին երկուսի պարագայում ինֆորմացիա ստանալը ավելի բարդ է, ապա մնում է քննիչը։ Այս դեպքում ԱԱԾ–ն պետք է առնվազն հետաքննություն սկսեր առ այն, թե որտեղի՞ց այդ տեղեկությունը հայտնի դարձավ ԶԼՄ–ներին։ Սակայն ԱԱԾ–ն նման հայտարարությամբ դեռևս հանդես չի եկել, ինչը կարող է նշանակել, որ կառույցը վերահսկում է վիճակը կամ կառույցին ձեռնտու է այս վիճակը։ Օհանյանի դեպքը կարծում ենք, միակը չի լինի և ԱԱԾ–ն ցանկացած պահի կարող է օգտագործել այս գործը` ամենատարբեր անձանց ներգրավվելու համար: Սա ցանկացած պահի կարող է դիտարկվել ոչ միայն ներքին սպառման ու զսպման աղբյուր, այլ նաև, հաշվի առնելով ենթադրյալ խմբի ենթադրյալ ղեկավարի հակասական ցուցմունքները, կարող է ըստ հայեցողության օգտագործվել արտաքին ամենատարբեր բևեռների դեմ։ Վայհայրենասիրական պաթոսը հուշում էր, որ դավադրության տեսությունների սիրահարները պետք է ի սկզբանե խոսեին ադրբեջանաթուրքական կամ մասոնական հերթական խարդավանքի մասին, բայց այդ լուրերը միանգամից կորան լրահոսում։ Այսինքն, կարող է աշխատել ավելի լուրջ նպատակներով օգտագործելու գործոնը։ Թե ի վերջո, երբ այս գործը կհասնի դատարան ու ինչ հետևանքներ կունենա, ցույց կտա ժամանակը։ Բայց այն, որ սա դարձել է արդեն ժամանակակից թրիլլերին բնորոշ հատկանիշներով օժտված գործ, կարծես ոչ մեկի մոտ կասկածի տեղիք չի տալիս։ Սպասենք հաջորդ սերիային, որը կարծում եմ կլինի առավել հուզական ու դրամատիկ, քան նախորդներն էին։
Շարունակությունը` «Փաստ» օրաթերթի այսօրվա համարում:
1
2
3
4
5
1
2
4
5
