Նուբարաշենի գերեզմանոցն աղտազերծելու նպատակով նոր տեխնոլոգիաներ կկիրառվեն

Նուբարաշենի գերեզմանոցն աղտազերծելու նպատակով նոր տեխնոլոգիաներ կկիրառվեն: Այս մասին, այսօր՝ նոյեմբերի 11-ին, նշվել է ՀՀ բնապահպանության նախարար Արծվիկ Մինասյանի եւ ՄԱԿ-ի Զարգացման ծրագրի բնապահպանական ծրագրերի համակարգող Արմեն Մարտիրոսյանի եւ «Ժամկետանց պեստիցիդների պաշարների ոչնչացում եւ կայուն օրգանական աղտոտիչներով (ԿՕԱ) աղտոտված տարածքների աղտազերծում` քիմիկատների անվտանգ կառավարման միջոցառումների շրջանակներում»  ՄԱԶԾ-ԳԷՀ լայնածավալ ծրագրի համակարգող Գայանե Ղարագեբակյանի հանդիպման ժամանակ:

Բնապահպանության նախարարությունից NEWS.am-ին հայտնում են, որ Գայանե Ղարագեբակյանը  ներկայացրել է 4.7 մլն դոլարի դրամաշնորհային ծրագրի հիմնական բաղադրիչները: Անդրադարձ է կատարվել մասնավորապես  Նուբարաշենի թունաքիմիկատների գերեզմանոցից 1050 տոննա առաջին կատեգորիայի կայուն օրգանական աղտոտիչներ պարունակող թափոնների տեղափոխման, արտահանման եւ ոչնչացման միջոցառումներին:

Արծվիկ Մինասյանին տեղեկացվել է, որ Ծրագրի կառավարման խորհուրդն իր նիստում որոշում է կայացրել Նուբարաշենից չտեղափոխել նախկինում նախատեսված եւս 7100 տոննա աղտոտված հողը, այլ այն վնասազերծել տեղում:

ՀՀ բնապահպանության նախարարը կարեւորել է ծրագրի երկրորդ բաղադրիչով նախատեսված 7100 տոննա երկրորդ կատեգորիայի աղտոտված հողը տեղում` Նուբարաշենի գերեզմանոցում աղտազերծելու նպատակով նոր տեխնոլոգիաների կիրառումը եւ այդ նպատակով այլընտրանքային ֆինանսավորման լրացուցիչ միջոցների ներգրավումը:

Արմեն Մարտիրոսյանը ներկայացրել է ՄԱԿ-ի Զարգացման ծրագրի շրջանակներում իրականացվող բնապահպանական դրամաշնորհային ծրագրերի ընթացքը:

Հանդիպմանը քննարկվել են նաեւ Հրազդան քաղաքի հարեւանությամբ գտնվող ՀՀ արտակարգ իրավիճակների նախարարության պահեստարանի տեղում` վտանգավոր քիմիական թափոնների կառավարման եւ ժամանակավոր պահպանման ազգային կենտրոնի հիմնման հետ կապված հարցերը: