Վանաձորում հասունանում է հերթական քաղաքական «քցոցին»
Օրերս լրացավ հայ քաղաքական դաշտի բազմափորձ ու կարկառուն ներկայացուցիչ և խոշոր պետական գործիչ, նախկին ԱԽՔ Արթուր Բաղդասարյանի ծննդյան 48–ամյակը։ Այս նշանակալի իրադարձությունը առավել կարևորվեց իր ծննդյան օրը նախկին ԱԽՔ և ներկայում էլ «Հայկական վերածնունդ» կուսակցության ղեկավարի հայեցակարգային քաղաքական հայտարարությամբ։ Իր հայտարարության մեջ Բաղդասարյան Արթուրը անդրադարձել էր իր քաղաքական գործունեության բազմաթիվ մութ ու աղմկահարույց կողմերին՝ մասնավորապես հիմնավոր կերպով ներկայացրել էր, թե ինչու են ինքը և իր կուսակցությունը որդեգրել հանուն իշխանության փշրանքներ ունենալու հասարակությանը մշտապես «քցելու» սկզբունքները։
Ներկայում բոլորովին էլ նպատակահարմար չէ բազմիցս իր քաղաքական ու հասարակական կեցվածքը փոխած և մշտապես իշխանության ծիրում նավարկած այս գործչի հայտարարության բոլոր կետերին անդրադառնալը, քանի որ ՕԵԿ–Հայկական վերածնունդի և նրա ղեկավարի մասին հստակ պատկերացում և վերաբերմունք ունեն հայաստանյան հասարակության բոլոր շերտերը։ Այս վերաբերմունքն ի դեպ բոլորովին էլ կապ չունի, թե սույն կուսակցությունը ՏԻՄ ընտրություններում ինչպիսի քվեներ է ստացել, որը բոլորովին այլ խնդիր է և պայմանավորված է մի շարք ապաքաղաքական հանգամանքներով։ Վերջիններիս մենք կանդրադառնանք առաջիկայում։
Սակայն Արթուր Բաղդասարյանի հայտարարության մեջ առկա էր մեկ ուշագրավ հանգամանք։ Սույն գործիչն անդրադառնալով Վանաձորում առկա ներկա իրավիճակին, մասնավորապես խորը վիրավորվածություն արտահայտեց, որ իր կուսակցության հասցեին մեղադրանքներ են հնչում առ այն, որ հենց ՀՎԿ անդամներն են իրենց սկզբունքներին համաձայն «քցել» ընդդիմության թեկնածուին, որին կուսակցությունը աջակցելու հուշագիր էր ստորագրել։ Այս մեղադրանքները բնականաբար լիովին տրամաբանական են, քանի որ Արթուր Բաղդասարյանն ու նրա կուսակցությունը բոլոր հնարավոր միջոցներով վաստակել են դրանք իրենց գործունեությամբ և քաղաքական դեմարշներով։ Սակայն առավել հետաքրքիր է այն, որ Բաղդասարյանը անթաքույց կերպով ակնարկում է, որ իրենք պատրաստ են Վանաձորում կոալիցիա կազմել հանրապետականի հետ և, իր խոսքով, զգալի դեր կատարել քաղաքի կառավարման գործում։
Այստեղ արդեն պարզ է դառնում, թե որտեղից են առաջացել այն 4 անհայտ ծագման ձայները, որոնց շնորհիվ հանրապետական թեկնածուն Վանաձորում հաղթեց։ Պարզվում է, որ այն ամբողջ ընդդիմադիր շոուն, որը խաղաց Վանաձորում Հայկական Վերածնունդը, ընդամենը «թանկով վաճառվելու» գործընթաց էր, որն ի դեպ լիովին Արթուր Բաղդասարյանի և նրա կուսակցության գործունեության տրամաբանության մեջ է։ Ըստ էության այս հայտարարությունից հետո արդեն իսկ հասկանալի է, որ մոտ ապագայում Հայկական Վերածնունդը կդադարեցնի բոյկոտը և կմիանա ՀՀԿ–ՀՅԴ դաշինքին։
Մի կողմից տեսականորեն սա կարող է որոշակիորեն վնասել նոր անվանափոխված ՕԵԿ–ին, սակայն մյուս կողմից ՕԵԿ–ՀՎԿ–ի մասին հայաստանյան հասարակության պատկերացումները գրեթե փոփոխություն չեն կարող կրել, քանի որ այս կուսակցությունը մասնագիտացած է այսօրինակ դեմարշներում և այդ մասին վաղուց արդեն գիտեն բոլորը։ Ուստի ցանկալի է, որ վերջապես ՕԵԿ–ՀՎԿ–ն վերադառնա իր բուն գործելաոճին և ազատի իր ներկայությունից ընդդիմադիր դաշտը գոնե Վանաձորում, քանի որ նման կուսակցությունների առկայությունը անվանարկում են մեր առանց այն էլ խառնիճաղանջ ընդդիմադիր դաշտը։
Pressmedia.am վերլուծաբան
1
2
3
4
5
1
2
3
4
1
2
3
5
