Փելեշյանը հոգևոր հովվին խնդրել է հայրաբար ներել իրեն. «Փաստ»
Մամուլ
«Փաստ» օրաթերթը գրում է.
Վանաձորի Հայ–Ավետարանական եկեղեցու հոգևոր հովիվ Ռաֆայել Գրիգորյանը հետ է վերցրել Վանաձորի ավագանու անդամ Արկադի Փելեշյանի դեմ ներկայացրած իր բողոք–դիմումը` իրավապահ մարմիններին հայտնելով, որ հաշտվել է Փելեշյանի հետ և չի ուզում, որ վերջինս քրեական պատասխանատվության ենթարկվի: Արկադի Փելեշյանը ևս դիմում է ներկայացրել վարույթն իրականացնող մարմնին՝ նշելով, որ զղջում է կատարած արարքի համար: Այս երկու ցուցմունքների հիման վրա քրեական գործը կարճվել է, և Փելեշյանի նկատմամբ քրեական հետապնդումը՝ դադարեցվել: Այս մասին երեկ հաղորդել է ՀՀ քննչական կոմիտեն:
Հիշեցնենք, որ Վանաձորի ավագանու ընտրություններում «Հայկական վերածնունդ» կուսակցության ցուցակը գլխավորող Արկադի Փելեշյանը հոկտեմբերի 4–ի երեկոյան, ժամը 21:00–ի սահմաններում, մտել էր Հայ–Ավետարանական եկեղեցի և ծեծի ենթարկել եկեղեցու առաջնորդ Ռաֆայել Գրիգորյանին՝ իբր ընտրություններին իր օգտին չքվեարկելու համար:
Երեկ Հայ–Ավետարանական եկեղեցու առաջնորդ Ռաֆայել Գրիգորյանը «Փաստի» հետ զրույցում ասաց, որ բողոքը հետ վերցնելու առաջին պատճառը եղել է Փելեշյանի հրապարակային ներողություն խնդրելը, որն արտատպվել էր բազմաթիվ կայքերում: Երկրորդ պատճառն էլ այն է, որ վերջինս եկել է իր մոտ և խոստովանել, որ զղջում է կատարվածի համար:
– Նա եկավ, հարգանքի խոսքեր ասաց ինձ, և ես նկատեցի, որ շատ խորը ապրումների մեջ է, շատ էր փոխվել: Ինձ միայն մեկ բան էր հարկավոր՝ որ նա այսուհետ ոչ մեկի նկատմամբ նման արարք իրեն թույլ չի տա:
–Եվ դուք հավատացի՞ք իր խոսքերին:
–Եթե դուք այնտեղ լինեիք և տեսնեիք իր հոգեվիճակն ու կեցվածքը, պահվածքն ու խոսքերը, կարծում եմ դուք էլ կհավատայիք:
–Պարոն Գրիգորյան, Ձեր նկատմամբ ճնշումներ եղե՞լ են բողոքը հետ վերցնելու պահանջով:
–Ինձ վրա չեն կարող ճնշել անգամ իշխանությունները, ինձ վրա կարող է ներգործել միայն Աստված: Ընդհակառակը, հնարավոր է իր (Փելեշյանի– խմբ.) վրա եղած լինի:
–Մինչ այս, լրատվամիջոցներին տված հարցազրույցներում դուք ասում էիք, որ պետք է մինչև վերջ գնաք: Բողոքի հետ վերցնելը առիթ չի՞ հանդիսանա նմանատիպ երևույթների կրկնության համար:
– Դեպքից հետո մամուլի հետ ունեցած իմ առաջին զրույցում ասել եմ, որ որպես քրիստոնյա ես ներել եմ նրան, բայց նա օրենքի առջև պատասխան պիտի տա: Ես չեմ ասել, որ ամեն ինչ կանեմ իրեն ոչնչացնելու համար: Այդպիսի հոգեբանությունն ինձ օտար է: Փելեշյանն ինքն ինձ մոտեցավ, համբուրեց և խնդրեց հայրաբար ներել իրեն՝ ասելով, որ խորապես ցավում և զղջում է, ինձ համար իր կողմից մեղքի գիտակցումը շատ ավելի մեծ է, քան իր բանտ նստելը: Մինչ այդ շատ անգամներ խնդրել էր տեսակցության համար, բայց ես մերժել էի՝ ասելով, որ ներում եմ, բայց չեմ կարող նույն սենյակում իր հետ լինել:
«Փաստը» փորձեց մեկնաբանություն ստանալ նաև Վանաձորի ավագանու անդամ Արկադի Փելեշյանից, սակայն մի քանի անպատասխան զանգերից հետո, ավագանու անդամի հեռախոսն անհասանելի դարձավ:
Շարունակությունը` «Փաստ» օրաթերթի այսօրվա համարում:
1
2
3
4
5
1
2
3
1
5
