«Նաիրիտի» պահպանության ծառայության 88 աշխատակից հեռացվելու է. նրանց փոխարեն կընդունվեն ոստիկաններ (Ֆոտո)

«Նաիրիտ» գործարանի պահպանության ծառայության աշխատակիցներին հեռացնում են, իսկ նրանց փոխարեն ընդունում ոստիկանների։ Այս մասին այսօր՝ նոյեմբերի 10-ին, Կառավարության դիմաց NEWS.am-ի հետ զրույցում ասաց գործարանի պահպանության ծառայության հերթափոխի պետ Սերգեյ Պապյանը։

«Մեզ եկան, ասացին, որ մեր ծառայությունը պետք է լուծարեն ու մեր տեղը ոստիկաններ բերեն։ 2008թ․-ին երբ «Նաիրիտ»-ում արտադրամասը պայթեց, ոչ ոստիկաններն էին եկել այնտեղի ժողովրդին օգնելու, ոչ էլ որեւէ մեկը, մենք էինք այդ ամենն ինչ անում։ Այս ընթացքում մենք աշխատավարձ չենք ստացել, բայց գործարանը սրտացավ պահել ենք։ Հիմա եկել, ասում են՝ հեռացված եք, երեւի այն պատճառով, որ մեր աչքերն այնտեղ չլինեն եւ ինչ ուզեն, այնտեղ գողանան։ Ի դեպ, մենք 88 հոգով պահպանում ենք 160 հա տարածք»,- ասաց նա։

Սերգեյ Պապյանի խոսքով, այս քայլով իշխանություններն ուզում են վերջնականապես երկիրը դարձնել ոստիկանական պետություն. «Եթե մեզ ամսական տալիս են 155 հազար աշխատավարձ, ապա ոստիկաններին հաստատ կրկնակի են տալու։ Թե ինչ են ուզում այս քայլով ասել, չենք հասկանում, երեւի ուզում են, որ այդ ծառայությունում աշխատող 88 երիտասարդներով թողնենք այս երկրից հեռանանք, ու իրենց երկիրը դարձնեն ոստիկանական։ Վարչապետն ասում ա՝ ծանրաձողը պիտի բարձրացնենք, էներգետիկայի նախարարն էլ ծանրաձողը գցում ա իր ոտերի վրա, ասում ա՝ չեմ կարա բարձրացնեմ։ Էներգետիկայի նախկին նախարարը գոնե ինչ որ քայլեր էր փորձում անել, իսկ սա ոչինչ չի անում»։

Սերգեյ Պապյանը նշեց նաեւ, որ գործարանի ներկա աշխատակիցներն արդեն 4-րդ ամիսն է՝ աշխատավարձ չեն ստացել, իսկ տնօրենն էլ խոստացել է հանդիպել վարչապետ Կարեն Կարապետյանի հետ եւ կքննարկի աշխատավարձի տալու խնդիրը։

Հիշեցնենք, որ «Նաիրիտ» գործարանի շուրջ 261 ներկա աշխատակից, որոնք իրենց 4 ամսվա աշխատավարձը չեն ստացել, նոյեմբերի 3-ին փակել էին մայրաքաղաքի Բագրատունյաց փողոցը եւ պահանջում էին իրենց աշխատավարձը։