Ինչու են դաստակին կարմիր թել կապում (լուսանկարներ)

Wnews.am-ը գրում է . 

Հետեւելով համաշխարհային դերասաններին, շոու-բիզնեիս ներկայացուցիչներին, հավանաբար նկատել եք, որ նրանցից ոմանք ձեռքին կարմիր թել են կապում։

Առաջին աստղը, ով ձախ ձեռքին կարմիր թել է կապել, լեգենդար Մադոննան է։ Նրանից հետո կարմիր թելով հանրությանը ներկայացան Փերիս Հիլթոնը, Բրիտնի Սփիրսը եւ այլ համաշխարհային աստղեր։

Այսօր էլ մեզանից շատերը դաստակին կարմիր թել են կապում. ի՞նչ է դա նշանակում։

Պատմությունը սկսվում է Իսրայելում: Հավատացյալ մարդկանց գիտակցության մեջ կարմիր թելը հանդիսանում է կենցաղային չարիքից և ճակատագրի հարվածներից պաշտպանելու սիմվոլ, քանի որ հենց դրանով է փաթաթված եղել բիբլիական նախամոր, մայրական սիրո և զոհողության մարմնացում Ռաքելի գերեզմանը: Մարդիկ այցելում էին նրա գերեզմանին կարմիր թելերով և լիցքավորում էին այն լուսավոր էներգիայով, որպեսզի հետո կապեին իրենց հարազատների և մտերիմների դաստակներին: Կարմիր թելը դառնում էր հուռութք, որը պաշտպանում էր վատ մարդկանց բացասական ազդեցությունից:

Ինչպե՞ս են կրում.

Թելը պետք է բրդյա լինի. բուրդը ոչ միայն վանում է բացասական էներգիան, այլ նաև ունի բուժիչ հատկություն:

Նրա համար, որպեսզի կարմիր թելը վերածվի հուռութքի, անհրաժեշտ է դրա վրա մի քանի հանգույց անել, ինչպես դա արել են մեր նախնիները: Աշխատանքն անհրաժեշտ է սկսել «լռության րոպեով», որի ժամանակ Դուք կենտրոնանում եք դրական էմոցիաների վրա և ազատվում եք բացասականից, քանի որ թելը հիշում է այն զգացմունքները, որը Դուք տածում եք նրա հետ աշխատանք կատարելու ընթացքում: Հանգույցների քանակը պետք է կենտ լինի: Հիշեք այն մասին, որ դրանցից ոչ մեկը չի կարող աննպատակ կապվել. յուրաքանչյուրը պետք է օժտված լինի որևէ ֆունկցիայով: Չարժե չափից շատ հանգույց անել: Օպտիմալ քանակությունը 7-ն է:

Կապելով հանգույց, մտովի արտասանեք, թե ինչ նպատակով եք դա անում: Նախօրոք մտածեք, թե կոնկրետ ինչ եք ուզում ստանալ։

Պատրաստի թելը կապվում է ձախ դաստակին: Դաստակը ամենախոցելի տեղերից մեկն է բացասական ներգործության համար, դրա համար էլ միշտ ավելի խնամքով է պաշտպանվել: Թելը պետք է կապի հարազատ մարդ:

Եթե որոշակի ժամանակ անց Դուք հայտնաբերում եք կարմիր թելի կորուստը, նշանակում է, որ այն գերհագեցել է բացասական էներգիայով, չթողնելով դրան Ձեզ մոտիկ, և ամբողջովին կատարել է իր ֆունկցիան:

Ինչ վերաբերում է կարմիր թելը կապելու երեւույթի վերաբերյալ Հայ առաքելական եկեղեցու դիրքորոշմանը, ապա այն բացասական է։

«Եթե զուտ կապում են՝ կապելու համար, այսինքն՝ կարմիր թելը դուր է գալիս՝ որպես զարդ, կարող են կապել, բայց եթե դա հավատալիք է՝ հաջողության, չար ուժի պաշտպանության համար, ապա ընդունելի չէ: Սա մոգություն է: Եթե դու մկրտված ես ու քո ճակատին դրոշմված է մյուռոնն ու խաչը, ու դու դրան չես ապավինում, ուզում ես՝ ոտքից գլուխ կարմիր թելով փաթաթվիր, օգուտ չունի: Սա սնոտիապաշտություն է, ինչը անընդունելի է»,-ասում է Տեր Շմավոն քահանա Ղևոնդյանը։