Հայաստանի զանգվածային ցույցերը ոգեշնչված են... Քիմ Քարդաշյանից. The Daily Beast

Tert.am–ը գրում է.

Ամերիկյան The Daily Beast լրատվամիջոցը գրում է, թե Հայաստանում ներկա դրությամբ ընթացող զանգվածային ցույցերը իրենց ոգեշնչումն առել են... Քիմ Քարդաշյանից:

Անդրադառնալով «Ոչ թալանին» նախաձեռնության ցույցերին` աղբյուրը գրում է, թե դրա համար շատ գործոններ ու նախադրյալներ կան, սակայն Քարդաշյանի ապրիլյան այցը Հայաստան օգնել է Հայաստանին` զարթոնք ապրել:

Մանրամասն ներկայացնելով Բաղրամյան պողոտայում ծավալվող իրադարձությունները` աղբյուրը նկատում է նաև, որ այս ցույցերը շատ խորհրդանիշներ ունեն, զանազան կոչեր և մի շատ անսպասելի հերոսուհի. դա Քիմ Քարդաշյանն է` որպես Տիկին Ազատություն, ինչպիսին Քիմն ընկալվում է իր հոր հայրենիքում:

Վկայակոչելով իր թղթակցի հարցումը երևանցիների շրջանակներում` աղբյուրը գրում է, թե շատերը իսկապես կարծում են, որ այս ամենի վրա իր ազդեցությունը կարող է թողած լինել անդադրում ինքն իրեն գովազդող Քիմ Քարդաշյանի և ամերիկահայկական System of a Dawn -ի համերգը:

Այս անձանց գալը Հայաստան հույզեր է առաջացրել ժողովրդի շրջանում, որը ցանկանում էր աշխարհի ուշադրությանն արժանանալ: Այն դեպքում, երբ, աղբյուրի ձևակերպմամբ, մինչև վերջերս Հայաստանը անհուսորեն  կառչած էր իր անցյալին, իսկ նվազող ազգաբնակչությունը մշտապես իր պատմական ողբերգություններն էր ողբում: Այնինչ հիմա ազգը գոհ-երջանիկ է, ինչպես կլիներ ցանկացած ազգ` նման երիտասարդություն ունենալով: