Տնտեսագետ․ Հայաստանի պետբյուջեի նախագծում բացասական միտում կա ՝ 119 մլրդ դրամ արտաքին պարտքի սպասարկման համար

ՀՀ Կառավարությունը բարդ իրագործելի խնդիր է դրել ՝ ապահովել 3․2 տոկոսի տնտեսական աճ։ Այս մասին նոյեմբերի 2-ին մամուլի ասուլիսի ժամանակ ասել է տնտեսագետ Կարլեն Խաչատրյանը։

2017-ի պետբյուջեի նախագիծը, նրա խոսքով, արտացոլում է երկրում ստեղծված իրողությունը։ «Էական, արմատական փոփոխություններ չկան։ Ավելի շատ ծախսեր են նախատեսված, քան եկամուտներ։ Մի քիչ ավելացել են սոցիալական ծախսերը՝ մոտավորապես 408 մլրդ դրամով։  Եվ որոշ չափով ավելացել են պաշտպանական ծախսերը ՝ 2․5 մլրդ դրամով»,- նշեց Խաչատրյանը։ Եթե գլոբալ դիտարկենք, շարունակեց տնետսագետը,  ապա բյուջեի նախագծում այն նույն տրամաբանությունն է, ինչ վերջին տարիների պետբյուջեներում։ «Կա միայն մեկ դրական միտում՝ գործադիր ու օրենսդիր իշխանությունների ծախսերի կրճատում մոտ 10 մլրդ դրամով՝ դա պայմանավորված է Կառավարության քաղաքականությամբ, որն ուղղված է բարձր ծախսերի օպտիմալացմանն ու նվազեցմանը։ Բացասական միտումն այն է, որ մենք տարեցտարի ավելի շատ գումարներ ենք ուղղում արտաքին պարտքի սպասարկման համար։ Մասնավորապես եթե 2016-ին արտաքին պարտքի սպասարկման համար մոտ 100 մլրդ դրամ էր հատկացվել, ապա 2017-ին՝ 119 մլրդ»,- շեշտեց Կարլեն Խաչատրյանը՝ հավելելով, որ դա պայմանավորված է օբյեկտիվ հանգամանքներով։