2017թ. Հայաստանը կուտակային կենսաթոշակի համար շուրջ 60 մլն դոլար կհատկացնի

2017 թվականին կուտակային կենսաթոշակների համաֆինանսավորման համար նախատեսվում է հատկացնել 28.7 մլրդ դրամ (շուրջ 60 մլն դոլար) կամ 1.9 մլրդ-ով ավելի՝ ի տարբերություն 2016 թվականի: Այս մասին այսօր՝ նոյեմբերի 2-ին, հայտարարել է աշխատանքի եւ սոցիալական հարցերի նախարար Արտեմ Ասատրյանը՝ ելույթ ունենալով պետական բյուջեի նախագծի խորհրդարանական լսումներին:

Դա պայմանավորված է կուտակային համակարգին մասնակցողների թվի՝ 13.4 հազարի աճով, մինչեւ 176.2 հազար մարդ, ինչպես նաեւ նրանց միջին աշխատավարձի 2.4% աճով (որքան աշխատավարձը բարձր է, այնքան բարձր է պետության լրավճարը):

Կենսաթոշակային կուտակային համակարգով նախատեսված է աշխատավարձի 5 տոկոսի չափով պարտադիր սոցիալական թիրախային վճարում: Նույնքան էլ պետությունն է ներդնում: Այս միջոցները կուտակվում են անձնական հաշվում, որը կառավարում է քաղաքացու ընտրությամբ ներդրումային մասնավոր 2 հիմնադրամներից մեկը:

Հիշեցնենք, որ Հայաստանում կուտակային համակարգը պետք է սկսեր գործել 2014 թվականի հունվարի 1-ից: Կտրուկ բողոքներից հետո համակարգը փոփոխության ենթարկվեց եւ երկրորդ անգամ գործարկվեց 2014-ի հուլիսի 1-ից: Այդ ժամանակից սկսած՝ պետական հատվածի աշխատողները վճարումներ են կատարում պարտադիր կարգով: Իսկ մասնավոր հատվածի աշխատողների համար այն հետաձգվել էր մինչեւ 2017-ի հուլիսի 1-ը, այնուհետեւ՝ մինչեւ 2018-ի հուլիսի 1-ը: Սակայն ցանկության դեպքում նրանք եւս կարող են հաշիվ բացել եւ վճարումներն սկսել: Համակարգը վերաբերում է 1974 թվականին եւ դրանից հետո ծնված անձանց: