Ես քնած չեմ եղել, Մերիի մայրն ինձ միջանցքում է տեսել. ծննդկանին հոսպիտալացրած բժիշկը ցուցմունք տվեց

Ծննդկան Մերի Մարգարյանի եւ նորածնի մահվան գործով այսօր՝ նոյեմբերի 1-ին, ցուցմունք տվեց հղիին 2015թ. հուլիսի 26-ին հոսպիտալրացած մանկաբարձ- գինեկոլոգ Տիգրան Սարգսյանը:

Շենգավիթ վարչական շրջանի ընդհանուր իրավասության դատարանում Տիգրան Սարգսյանը պատմեց, որ Մերի Մարգարյանին հոսպիտալացրել է Շուշանիկ Բախշյանի զանգից հետո:

«Շուշանիկ Բախշյանն այդ օրը ժամը 16:00-ին զանգել էր մեր հերթապահ մյուս բժշկուհուն, ասել, որ մի հղի ունի, որը մի քանի օր է՝ ջերմում է, կգա հիվանդանոց, հոսպիտալացրեք եւ հետազոտություններ արեք: 16:20-ին Մերի Մարգարյանը եկավ, զննել ենք, հոսպիտալացրել, Շուշանիկ Բախշյանի խնդրանքով էլ հղիի մորն էլ թույլ տվել, որ բարձրանա վերեւ»,- ասաց Տիգրան Սարգսյանը:

Հերթապահ բժիշկը հետազոտություններ է արել եւ ախտորոշել սուր շնչառական հիվանդություն, ձախ երիկամի բորբոքում: Տիգրան Սարգսյանը, իր ցուցմունքի համաձայն, հղիին հետազոտել է նաեւ 21:30-ի սահմաններում՝ համայցի ժամանակ, որից հետո արդեն ժամը 04:00-ի սահմաններում, քանի որ Մերի Մարգարյանի մայրն իրեն մոտեցել է միջանցքում եւ ասել, որ դուստրը փսխում է: Նշենք, որ ծննդկանի մայրն ավելի վաղ դատարանում հայտարարել էր, թե Տիգրան Սարգսյանին այդ օրը գտել է նրա սենյակում՝ քնած վիճակում:

«Չկա նման բան, ես մեկ այլ հղիի մոտից դուրս էի եկել, գնում էի դեպի իմ սենյակ, միջանցքում Մերիի մորն եմ հանդիպել, որն էլ ասաց, թե աղջկա ջերմությունն իջել է մինչեւ 35,4: Ինձ հետ էր նաեւ անեսթեզիոլոգ- ռեանիմատոլոգ Արամ Գրիգորյանը, որը Մերիին ճանաչում է, ասաց՝ թեյ տվեք, սավանով թող ծածկվի»,- պատմեց մանկաբարձ- գինեկոլոգը:

Ըստ Տիգրան Սարգսյանի՝ Մերի Մարգարյանի մոտ կեսարյան հատման որեւէ ցուցում չի եղել:

Հատկանշական է, որ վկան այնքան մանրամասնությամբ խոսեց դատարանում, որ նույնիսկ դատավորը զարմացավ:

«Կարդացե՞լ եք Ձեր ցուցմունքը, ո՞նց եք հիշում, թե այդ օրը Մերիի ճնշումն ինչքան էր, սրտի զարկն ինչքան էր, պտղինը»,- վկային դիմեց դատավոր Դավիթ Բալայանը:

Տիգրան Սարգսյանը հայտարարեց, որ մանրամասները հիշում է, քանի որ արտառոց դեպք էր:

Նշենք, որ թեեւ երկու մեղադրյալի՝ Շուշանիկ Բախշյանի եւ Անի Բաբելյանի մասով նախաքննությունն ավարտվել եւ գործն ուղարկվել է դատարան, նախաքննական մարմինը նշանակել է եւս մեկ հանձնաժողովային դատաբժշկական փորձաքննություն՝ պարզելու արդյոք «Շենգավիթի» բուժաշխատողներից էլի կան այնպիսիք, որոնք մեղավորություն ունեն կատարվածի համար: Մասնավորապես, քննվում է Տիգրան Սարգսյանի, Աշոտ Սիրունյանի, Արամ Գրիգորյանի եւ Աշոտ Ամրոյանի հարցը:

Ավելի վաղ Քննչական կոմիտեն հաղորդել էր, որ «Շենգավիթ» ԲԿ-ի բժշկուհի Շուշանիկ Բախշյանը 2015 թվականի հուլիսի 23-ին հեռախոսակապի միջոցով տեղեկացել է, որ իր հսկողության տակ գտնվող հղի Մերի Մարգարյանն ունեցել է բարձր ջերմություն եւ վերջինիս խորհուրդ է տվել ընդունել «Պարացետամոլ» դեղահաբ։ 2015 թվականի հուլիսի 24-ին հղի կնոջը հրավիրել է բժշկական կենտրոն հերթական կոնսուլտացիայի համար եւ տեղյակ լինելով Մերի Մարգարյանի բարձր ջերմություն ունենալու մասին՝ չի հոսպիտալացրել նրան: 2015 թվականի հուլիսի 27-ին, երբ Մերի Մարգարյանը ստացիոնար բուժում է ստացել «Շենգավիթ» բժշկական կենտրոնում, առավոտյան ժամը 09.00-ից սկսած, արյան բիոքիմիական եւ մնացած հետազոտությունների արդյունքում արձանագրվել է արագ ընթացող եւ հղիության հետ կապված զարգացող փոփոխություններ, որի պայմաններում չի կատարվել կյանքի ցուցումով անհապաղ ծննդալուծում, այդ թվում նաեւ՝ կեսարյան հատման միջոցով, ինչի հետեւանքով առաջացած բազմաօրգանային անբավարարությունից 2015 թ. հուլիսի 29-ին Մերի Մարգարյանը մահացել է, իսկ հաջորդ օրը թոքերի եւ գլխուղեղի այտուցից մահացել է նաեւ նրա նորածին դուստրը: