Ուժեղ այլընտրանքի «աթոռը» դեռևս թափուր է
Քաղաքական վերլուծաբան Արծրուն Պեպանյանի կարծիքով, թեև ՀՀ նորանշանակ վարչապետի առաջարկած քայլերը ողջունելի են շատերի համար և հասարակության ստվար մասը ցանկանում է, որ դրանք իրականանան, սակայն չի բացառում, որ հակառակը ցանկացողներ նույնպես կլինեն, որպեսզի իրենք նույնպես վնասներ չկրեն:
Նա նաև տեսակետ է հայտնել, որ ընդդիմությունը նույնպես չի ուզում, որ նոր վարչապետը հաջողություն ունենա, քանի որ այդ դեպքում իշխանությունների վարկանիշը կբարձրանա, ինչի ժամանակ ավելի տեսանելի կդառնա ընդդիմության թուլությունը:
Խոսելով վերջին շրջանում Գագիկ Ծառուկյանի՝ օրակարգային դարձած հնարավոր վերադարձի մասին՝ նա նշել է, որ ԲՀԿ հիմնադիր և նախկին առաջնորդի վերադարձն առանձնապես չի կարող որևէ բան փոխել քաղաքական կյանքում, քանի որ, ըստ նրա, հնարավոր չէ հիշել, թե նրա օրոք ինչ բեկումնային քայլեր են իրականացվել:
Մասամբ ընդունելով քաղաքական վերլուծաբանի առաջին տեսակետը՝ նշենք, որ դժվար է ընդունել Ա. Պեպանյանի երկրորդ միտքը, որ Գագիկ Ծառուկյանի հիմնած կուսակցությունը կուլիսային էր և իրականում չէր կարողանում հակակշիռ դառնալ իշխող ՀՀԿ-ին: Անկեղծ ասած, կարևոր էլ չէ, թե քաղաքական որ ուժին կամ քաղաքական որ գործչին կհաջողվի ստանձնել այդ էստաֆետը: Կարևոր է, որ չխախտվի քաղաքական համամասնությունը: Եվ հանուն անկեղծության նշենք, որ իրականում ԲՀԿ-ն հենց այն այլընտրանքն էր, որն այսօր չկա և որի պատճառով էլ խախտվեց ուժեղ այլընտանք ունենալու հնարավորությունը: Ի դեպ, ամենևին էլ կարևոր չէ, թե որպես այլընտրանքային քաղաքական ուժ որ կուսակցությունը հանդես կգա կամ այն ում «դեմքով» կներկայանա, կարևորը նրա ամուր գոյությունն ու ներկայությունն է, որն առողջարար կլինի ոչ միայն հասարակության, այլև իշխանության գործունեության համար:
Դժվար է ասել, թե արդյո՞ք Ծառուկյանը որոշում կկայացնի կրկին վերադառնալ ակտիվ քաղաքականություն, բայց այն, որ նրա հեռանալուց հետո քաղաքական դաշտում խորը անդունդ առաջացավ ու արդեն երկու տարի է, չի վերանում փաստ է:
Իսկ այն, որ վերջին շրջանում սնկի պես աճած կուսակցություններին նույնպես չի հաջողվում հակակշռող ուժ դառնալ, նույնպես մտահոգիչ է, քանի որ քիչ ժամանակ է մնացել առաջիկա խորհրդարանական ընտրություններին:
Չնայած ամեն ինչ դեռ կորած չէ և քաղաքական դաշտի թարմացման առաջին ազդակներն են ստացվում:
Արմինե Գրիգորյան
Orer.am վերլուծաբան
1
2
3
4
5
1
2
3
4
1
2
3
5
