Այսօր գլխուղեղի կաթվածի դեմ պայքարի համաշխարհային օրն է

Աշխարհի ավելի քան 40 երկրում հոկտեմբերի 29-ը նշվում է որպես գլխուղեղի կաթվածի (ինսուլտի) դեմ պայքարի համաշխարհային օր: Ամբողջ աշխարհում խնդրի լուծման համար ամենից շատ կարևորվում են կանխարգելիչ միջոցառումները: Դրանցից շատերն անցկացվում են հենց գլխուղեղի կաթվածի դեմ պայքարի օրվա (World Stroke Day) շրջանակում, որը 2004թ. սահմանվել է Գլխուղեղի կաթվածի դեմ պայքա րի համաշխարհային կազմակերպության (World Stroke Organization, WSO) կողմից:

Հայաստանում տարեկան արձանագրվում է գլխուղեղի անոթային հիվանդությունների ավելի քան 5 հազար դեպք: Դրանց կեսն ունենում է մահվան ելք, իսկ մյուս կեսը ձեռք է բերում տարբեր աստիճանի հաշմանդամություն:

Ուղեղի անոթային հիվանդությունների հիմնախնդիրը և ամենամյա աճը առաջնահերթ լուծում պահանջող խնդիրներից մեկն է:

Հիվանդության դեմ պայքարից անմասն չի մնացել նաև Հայաստանը: 2014թ. մայիսին Երևանի Մ.Հերացու անվան պետական բժշկական համալսարանի «Հերացի» թիվ 1 համալսարանական հիվանդանոցում բացվել է նյարդավիրաբուժության և գլխուղեղի կաթվածների բուժման մասնագիտացված կենտրոն, որը ղեկավարում է ԵՊԲՀ նյարդավիրաբուժության ամբիոնի վարիչ, պրոֆեսոր Ռուբեն Ֆանարջյանը: Կենտրոնում առկա են բոլոր հնարավորությունները՝ նյարդաբանական հիվանդությունների ախտորոշման և բուժման համար: Հիվանդները գլխուղեղի կաթվածի վիրահատության համար այլևս արտասահման մեկնելու կարիք չունեն: