Սպանված Լեւոնը նշանածի ծննդյան օրը ծնողներին անակնկալ էր անելու, բայց չհասցրեց (լուսանկար, տեսանյութ)

News.am-ը գրում է . 

«Պատանի լրագրողներ» դպրոցում դանակահարվելու հետեւանքով մահացած Լեւոն Սահակյանը պատրաստվում էր ամուսնանալ նշանածի հետ: NEWS.am-ի հետ զրույցում նրա հարեւանուհիներից տիկին Մարիետան պատմեց, որ Լեւոնն ու Արեգնազն արդեն մեկ տարի նշանված էին, իսկ հաջորդ տարվա աշնանը պատրաստվումպետք է ամուսնանային:

«Շատ լավ զույգ էին` սիրուն, համեստ: Մայրն ասում էր` Լեւոնիս իսկական հայկական հարսանիք եմ անելու` մեծ ու շատ հյուրերով»,-պատմեց հարեւանուհին:

Նա նշեց, որ Լեւոնի հուղարկավորեցին հենց նշանածի` Արեգնազ Թովմասյանի ծննդյան օրը, իսկ Լեւոնն այսօրվա հետ կապված այլ ծրագրեր ուներ. պետք է նշանածին ծննդյան օրվա կապակցությամբ տաներ ձիարշավարան, այնուհետեւ հորն ու մորն անակնկալ աներ` Արեգնազին տաներ իրենց տուն, որ իրենց հետ սկսի ապրել. «Իրար շատ էին սիրում ու այնպես եղավ, որ Լեւոնին հուղարկավորեցին հենց Արեգնազի ծննդյան օրը: Լեւոնը մորն ու հորն ասել էր` Արեգնազին ծննդյան օրը տանելու է ձիարշավարան, հետո բերելու է  տուն, որ մամ ու պապա ասի իրենց ու մնա իրենց տանը…»:

Ավելի վաղ NEWS.am-ը տեղեկացրել էր, որ Սեւանում այսօր տեղի է ունեցել «Պատանի լրագրողներ» դպրոցում դանակահարված 22-ամյա Լեւոն Սահակյանի հուղարկավորությունը:

Ավելի վաղ տեղեկացրել էինք, որ հոկտեմբերի 19-ի երեկոյան «Պատանի լրագրողների» դպրոցի տնօրեն Վահան Ղազարյանի եւ Լեւոն Սահակյանի միջեւ վիճաբանությունն սկսվել էր Լեւոնի նշանածի աշխատավարձը չվճարելու պատճառով: Լեւոնի նշանածը՝ Սեւան քաղաքի բնակչուհի Արեգնազը, աշխատելիս է եղել Վահան Ղազարյանի մոտ, որը նրա աշխատավարձը չէր վճարել: Այդ օրը Վահան Ղազարյանը 22-ամյա երիտասարդին զանգել եւ կանչել է դպրոց՝ նշանածի աշխատավարձը տալու համար, սակայն, նրանց միջեւ վիճաբանություն է սկսվել, որից հետո սրտի եւ թոքի վնասվածքներով Լեւոնը տեղափոխվել է հիվանդանոց, որտեղ երկու օր անց մահացել է:

Վահան Ղազարյանը կալանավորված է: