Կրակոցներ հայկական պատվիրակության հետեւից

Lragir.am-ը գրում է.

Հայաստանի պաշտպանության նախարարությունը տեղեկություն է տարածել հրադադարի ռեժիմի խախտման մասին, որ տեւական ընդմիջումից հետո կրկին թույլ է տվել Ադրբեջանը: Ընդ որում, Ադրբեջանի գործողությունն այս դեպքում ունի երկու առանձնահատկություն. հրադադարի ռեժիմը խախտվել է Նախիջեւանի ուղղությունից, եւ այն բանից հետո, երբ հայկական պատվիրակությունն ավարտել է իր ելույթները Բաքվում անցկացվող եվրոպական օլիմպիադայում ու վերադառնում է Հայաստան:

Եվրաօլիմպիադային հայկական պատվիրակության մասնակցությունն ավարտելու եւ Հայաստան վերադառնալու մասին տեղեկատվությունը տարածվեց հունիսի 26-ին: Եվ ահա, մի քանի ժամ անց տեղեկություն տարածվեց, որ Ադրբեջանը խախտել է հրադադարի ռեժիմը, ընդ որում կիրառելով խոշոր տրամաչափի զենքեր:

Հրադադարի խախտման հետեւանքով բռնկված մարտում հայկական կողմը ունեցել է մեկ զոհ: Ըստ Հայաստանի ՊՆ մամուլի քարտուղարի, Ադրբեջանն ունեցել է մեծ կորուստներ:

Նախիջեւանի ուղղությունը հրադադարի ռեժիմի պահպանման առումով ամենահանգիստն է եղել տարիներ շարունակ: Այստեղ հրադադարի խախտման դեպքերը երկու տասնամյակի ընթացքում հազիվ մի քանիսն են: Սակայն առանձնահատկությունն այստեղ այն է, որ Նախիջեւանում գործում է համազորային թուրք-ադրբեջանական բանակ, այսինքն հաշվի առնելով թե համազորային բանակի առկայության, թե Նախիջեւանի կարգավիճակի հետ կապված հանգամանքները, հնարավոր է արձանագրել, որ Նախիջեւանի ուղղությամբ հրադադարի խախտումները առնվազն իրավական առումով ներառում են ոչ միայն Ադրբեջանը, այլ նաեւ Թուրքիան եւ Ռուսաստանը:

Ներկայում հրադադարի խախտման առանձնահատկություն է առկա նաեւ այն պատճառով, որ սահմանային հերթական բախումը տեղի է ունենում Հայաստանում քաղաքացիական ցույցերի ֆոնին, ինչպես նաեւ հայ-ռուսական մի շարք համաձայնությունների, որոնց մասին խոսվել է Սերժ Սարգսյանի եւ հայ-ռուսական միջկառավարական հանձնաժողովի ռուսաստանցի համանախագահ, ՌԴ տրանսպորտի նախարար Մաքսիմ Սոկոլովի հանդիպմանը:

Մասնավորապես, այդ հանդիպմանը Սերժ Սարգսյանը հայտարարել է հայ-ռուսական 200 միլիոն վարկային համաձայնագրի մասին, որը Հայաստանին կօգնի համալրել սպառազինությունը ժամանակակից զինատեսակով: Ձեռք են բերվել նաեւ մի շարք այլ համաձայնություններ, որոնք Հայաստանի համար ունեն էական նշանակություն:

Մինչդեռ, դրանց նախորդել էին ոչ պակաս կարեւոր իրադարձություններ, երբ ՌԴ պաշտոնական քարոզչամիջոցները Հայաստանում էլեկտրաէներգիայի թանկացման դեմ քաղաքացիական շարժումը համառորեն որակեցին հակառուսական մայդան: Այդ որակումներում նույնիսկ որոշակի խուճապ էր նկատվում: Դրա ֆոնին հայ-ռուսական համաձայնությունները բավական հետաքրքիր են հնչում, եւ այնպիսի տպավորություն է, որ Երեւանը ռուսական պաշտոնական քարոզչությամբ արտահայտված «մայդանային» մտահոգությունները փարատել է տնտեսական, անվտանգության հարցերում եւ Պերմյակովի գործում Ռուսաստանի զիջումների կամ փոխզիջումների պայմանով:

Պատկերն ամբողջանում է նրանով, որ Սերժ Սարգսյանը նախօրեին է վերադարձել Բրյուսելից, որտեղ ԵԺԿ գագաթնաժողովին էր մասնակցում եւ որտեղ միաժամանակ տեղի էին ունենում ՆԱՏՕ անդամ երկրների արտգործնախարարների եւ պաշտպանության նախարարների հավաքներ:

Հունիսի 26-ին հեռախոսազրույց է տեղի ունեցել ԱՄՆ եւ Ռուսաստանի նախագահի միջեւ, որտեղ ամենայն հավանականությամբ չեն շրջանցվել Կովկասի խնդիրները:

Ահա այդ իրադարձությունների ֆոնին, Նախիջեւանի ուղղությամբ խախտվում է հրադադարը: