Յուրաքանչյուր կնոջ կյանքի առաքելությունը հենց մայրանալն է. Գայանե Ավետիսյանը՝ ապագա ծրագրերի ու «Դոմինո» սիթքոմի մասին (լուսանկար)

Life.panorama.am-ը գրում է . 

Հոկտեմբերի 11-ից «Դոմինո» սիթքոմը կրկին եթերում է: Նոր` 3-րդ եթերաշրջանում սիթքոմում հանդես են գալիս  նոր դերասաններ ու արդեն գործող կերպարների բոլորովին նոր կարգավիճակներ:

Life.panorama.am-ը զրուցել է դերասանուհի Գայանե Ավետիսյանի հետ, ով  «Դոմինո»-ում հայտնի է որպես լիդեր Սոֆա, ումից անգամ ամուսինն է վախենում, սակայն այս անգամ ամեն բան փոխվել է.

«Ինչպես արդեն հեռուստադիտողը հասկացել է` մեր 3-րդ եթերաշրջանում Սոֆան հղի է, ինչն ինձ համար շատ անակնկալ էր, բայց եւ սպասված, որովհետեւ, եթե նա ամուսնացած էր, ուրեմն ընտանիքի համալրումն իրեն երկար սպասեցնել չէր տա: Պետք է անկեղծորեն ասեմ, որ այդ կարգավիճակը կերտելիս մի փոքր դժավրություններ կար, քանի որ ինքս երբեւէ այդ կարգավիճակում չեմ եղել ու դժվար էր առանց իմանալու, թե դա ինչ է, ճիշտ մարմնավորել: Պատկերացրեք, հենց իմացա այս անգամ դերիս բնույթը, սկսեցի բոլոր ընկերուհիներիս, ովքեր մայրիկներ են, հարցուփորձ անել, մանրամասների տիրապետել, իսկ երբ նկարահանման հրապարակում այդ փորիկը հայտնվեց ինձ վրա, ամեն բան իր տեղն ընկավ»,- նշեց Գայանեն ու ծիծաղելով պատմեց հետաքրքիր զուգադիպության մասին.

«Նկարահանման հրապարակում արդեն իսկական զավեշտ է դարձել ինձ հետ կատարվող զուգադիպությունը. Հենց կրում եմ այդ արհեստական փորիկը, սկսում եմ ինձ վատ զգալ` ճնշումս է ընկնում, գլխապտույտ եմ ունենում, անմիջապես հղիի կարգավիճակին համապատասխան զգացողություններ եմ ունենում: Չեմ հասկանում, թե  ինչպես է դա պատահում, հավանաբար լարվածությունից է, ներշնչանքից»:

Եթե «Դոմինո»-ում Սոֆան առաջ լիդեր էր, ավելի խիստ, ապա հիմա նա շատ նրբազգաց է դարձել, ամեն ինչից հուզվող ու առավել բարի: Գայանեի խոսքով` ինքն իրեն նմանեցնում է ավելի շատ նոր Սոֆային.

«Իրականում ես շատ նրբազգաց եմ, ներաշխարհս ավելի նուրբ է, նեղացկոտ եմ ու այս առումով նոր Սոֆան ինձ ավելի մոտ է»,- հավելեց նա:

Մեր հարցին, թե Գայանե Ավետիսյանն իրականում չի՞ մտածում մայրանալու մասին, դերասանուհին ժպիտով նկատեց.

«Հուսամ, որ մոտ ապագայում այդ հրաշքն ինձ հետ էլ կկատարվի: Կարծում եմ` յուրաքանչյուր կնոջ կյանքի առաքելությունը հենց մայրանալն է, ընտանիք կազմելը: Ես կարիերիստ չեմ, ինձ համար ամեն ինչ մի կողմ է գնում, երբ խոսքը վերաբերվում է ընտանիքին ու մայրանալուն: Հղիությունը բնության պարգեւն է ու յուրաքանչյուր կին պետք է կարողանա այն ճիշտ ընդունել, իսկ հետ ճիշտ դաստիարակել իր սերունդը»:

Անդրադառնալով սիթքոմի նոր դերասաններին` Գայանեն շեշտեց.

«Նախ նշեմ, որ ամառային դադարի ընթացքում շատ էի կարոտել մեր թիմը, որովհետեւ մեզ մոտ իսկապես շատ ուրախ ու ջերմ մթնոլորտ է տիրում: Հիմա ցավով պետք է նշեմ, որ մեր սիրելի ու հրաշալի մի քանի դերասաններ չեն նկարահանվում, որովհետեւ իրենց գիծն ավարտվեց սիթքոմում, միաժամանակ ուրախ եմ նաեւ նոր դերասանների համար. Շատ հաճելի է, որ հիմա նկարահանվում եմ Արփինե Իսրայելյանի հետ, քանի որ նրա հետ նախկինում էլ աշխատել ենք ու ընկերություն ենք արել նախագծերից դուրս: Կրածում եմ` «Դոմինո»-ի նոր եթերաշրջանը շատ ավելի պայծառ ու լուսավոր պետք է լինի, քան նախորդները, որովհետեւ դա ճիշտ աշխատելաձեւ է` պետք է ինքներս մեզ գերազանցենք, այլապես կլճանանք»:

Անդրադառնալով ստեղծագործություններին` Գայանե Ավետիսյանը նշեց, որ առաջիկայում նոր երգեր կթողարկվեն, որոնք ինքն է հեղինակել, սակայն չցանկացավ փակագծեր բացել ու նշել իր հետ համագործակցած արտիստների անունները:

Հեղինակ` Անուշիկ Մելքոնյան