ԱՄՆ եւ ՆԱՏՕ ՀՀՊ համակարգերի սպառնալիք համարելը սպառնալիք է ՀՀ անվտանգությանը. Ազատ դեմոկրատներ

Ազատ դեմոկրատներ կուսակցությունն անընդունելի է համարում ՀԱՊԿ գագաթաժողովի ընթացքում Հավաքական անվտանգության պաշտպանության կազմակերպության անդամ երկրների՝ ԱՄՆ եւ ՆԱՏՕ հակահրթիռային պաշտպանական համակարգերի՝ որպես անվտանգության սպառնալիք բնորոշումը: Այս մասինNEWS.am-ը տեղեկանում է Ազատ դեմոկրատներ կուսակցությանտարածած հաղորդագրությունից:

Հայտարարությունում ասվում է, որ նման բովանդակությամբ փաստաթղթի ընդունումը, քանզի վերոնշյալ դրույթի ներառումը ՀԱՊԿ ռազմավարության մեջ ակնհայտորեն չի բխում Հայաստանի Հանրապետության, ինչպես նաեւ ՀԱՊԿ մյուս անդամ-պետությունների շահերից:

«Երեկ ռուսական «Ինտերֆաքս» լրատվականին տված հարցազրույցի ժամանակ ՀԱՊԿ-ում ՌԴ պաշտոնական ներկայացուցիչ, ՌԴ ԱԳՆ հատուկ հանձնարարություններով դեսպան Վիկտոր Վասիլյեվը հայտարարել է, որ Հավաքական անվտանգության պաշտպանության կազմակերպության անդամ երկրները ԱՄՆ եւ ՆԱՏՕ հակահրթիռային պաշտպանական համակարգերը համարում են իրենց անվտանգության սպառնալիք եւ պատրաստվում են դիմակայել այդ համակարգերին:

Վասիլյեվը տեղեկացրել է, որ այդ հարցի վերաբերյալ դրույթը ներառված է կազմակերպության մինչեւ 2025 թ. համար մշակված hավաքական անվտանգության ռազմավարության նախագծի մեջ եւ նշել, որ այն կհասատատվի այսօր՝ հոկտեմբերի 14-ին, Երեւանում կայանալիք ՀԱՊԿ գագաթաժողովի ընթացքում:

Մենք միշտ շեշտել ենք, որ ՀԱՊԿ-ը ՌԴ իշխանությունների աշխարհաքաղաքական նկրտումներին եւ շահերին հարմարեցված կառույց է եւ նման բովանդակությամբ ռազմավարության ընդունումն էլ ապացուցում է, որ Ռուսաստանն Արեւմուտքի հետ ունեցած իր հակասությունների հորձանուտ է ցանկանում ներքաշել նաեւ ՀԱՊԿ անդամ պետություններին՝ դրանից բխող բոլոր բացասական հետեւանքներով: Փաստացիորեն, այս ռազմավարության ընդունումով Ռուսաստանը ցանկանում է ցույց տալ, որ մի ամբողջ անվտանգության համակարգի համար Արեւմուտքը եւ ՆԱՏՕ-ն սպառնալիք են:

Վստահ ենք, որ այդ ռազմավարության ընդունումն էլ ավելի կսրի իրավիճակը մեր՝ առանց այն էլ լարված տարածաշրջանում, քանզի ՀԱՊԿ-ՆԱՏՕ հակասությունների սրումը չի բխում  թե՛ տարածաշրջանի եւ թե՛ միջազգային անվտանգության շահերից:

Եւս մեկ անգամ շեշտում ենք, որ ՀԱՊԿ այս ռազմավարությունն ակնհայտ սպառնալիք է ՀՀ անվտանգությանը, լրջագույն խոչընդոտ կարող է դառնալ Լեռնային Ղարաբաղի հիմնախնդրի լուծման եւ միջազգային ճանաչման գործընթացի համար, ծանր հետեւանքներ կարող է ունենալ ՀՀ քաղաքական եւ տնտեսական բազմավեկտոր ինտեգրացիոն գործընթացների վրա, որն էլ կարող է Հայաստանին տանել մեկուսացման քաղաքակիրթ աշխարհից:

ՀՀ իշխանությունները պարտավոր են զերծ մնալ նման փաստաթղթի ստորագրումից»,-ասված է հայտարարությունում: