Որքան ավելի ձգձգվի էլեկտրաէներգիայի թանկացման հարցի լուծումը, այնքան ավելի կծավալվեն ժողովրդի պահանջները

Կոնստանտին Տեր-Նակալյանը ֆեյսբուքյան իր էջում գրում է .

Որքան ավելի ձգձգվի Էլեկտրաէներգիայի սակագնի հարցի լուծումը, այնքան ավելի կխստանան ու կծավալվեն ժողովրդի պահանջները։ Կա մի աքսիոմատիկ բանաձև. եթե չեն լուծվում սոցիալական բունտի բերված սոցիալական պատճառները, դրանք աստիճանաբար վերաճում են քաղաքական բունտի, իսկ քաղաքական բունտը կամ հասնում է հաջողության, ու տեղի է ունենում հեղաշրջում/հեղափոխություն, կամ էլ այդ ընդվզումը ճնշվում է բիրտ ուժով (մարտի 1)։

Մի բան ակնհայտ է՝ մարդիկ իրենք-իրենցով չեն ցրվելու, մինչև չկատարվի հիմնական պահանջը՝ 6.93 դրամի թանկացման չեղյալ հայտարարելը։ Միևնույն ժամանակ արդեն 5-րդ օրն է, որ բացի Կառավարության կողմից առաջարկված անեկդոտիկ լուծման, այն է՝ անապահովների նպաստները 2000 դրամով ավելացնելը, ոչ մի քայլ դեռևս չի արվել այս ուղղությամբ, ինչն ավելի է շատացնելու փողոց դուրս եկող մարդկանց թիվը։
Մյուս կողմից, իշխանություններն էլ անհարմար կացության մեջ են, քանի որ պարզ է, որ եթե առանց որևիցե բան ասելու չեղյալ հայտարարեն ՀԾԿՀ որոշումը, ստացվում է, որ ընդունելու են, որ ՀԾԿՀ-ն ստում էր, երբ ասում էր, որ անհնար է չթանկացնել, բայց սա դեռ խնդիրը չէ։ Խնդիրը նրանում է, որ ցանկացած պարագայում պետք է անցկացվի ընկերության, իսկ իդեալական տարբերակով՝ ամբողջ էներգետիկ դաշտի աուդիտ, ընդ որում, ոչ թե «տնական» աուդիտորներ ներգրավելով, ալ հեղինակավոր ու անկախ աուդիտորական ընկերությունների, որոնք պետք է պարզեն ու հստակ պատասխան տալ հետևյալ հարցերին.

ա. Այդ ինչպե՞ս է ստացվել, որ ՀԷՑ-ն այսքան պարտք է կուտակել ու վնասով է աշխատում։

բ. Ո՞ւր են գնացել ՀԷՑ-ի կողմից վերցված պարտքերը, ու ո՞ւր են գնում էլեկտրաէներգիայի սակագնի համար գանձվող վճարները։ Կա՞ արդյոք այս ամենում հանցակազմ։

գ. ՀԷՑ-ը միլիոնավոր դոլարների ներդրումների մասին է հայտարարագրել։ Պետք է պարզել, թե դրանց որ մասն է իրականում տեղ գտել։ Օրինակ՝ պետք է պարզել, թե արդյո՞ք նոր տրանսֆորմատորներ են գործարկվել, թե՞ հները դուրս են գրել, հետո մի քիչ կարգի բերելուց ու ներկվելուց հետո ներկայացվել են որպես թոփ-թազա սարքավորում...

գ. Նազարյանը տխուր հայացքով հայտարարում էր, որ 37 միլիարդի վնաս է կուտակվել ամբողջ էներգետիկ համակարգում։ Հրաշալի է, այդ դեպքում պետք է պարզել, թե այդ հնչեցված թվի որ մասն է իրոք օբյեկտիվ հանգամանքներով պայմանավորված, իսկ որ մասն է առաջացել «վատ կառավարման» արդյունքում (ոնց հասկացա՝ ատկատ անելն ու թալանելն այսուհետ կոչվում է «վատ կառավարում»)։ Բա որ հանկարծ պարզվի, որ էդ 37 միլիարդի զգալի մասով էլ թանկով ցեմենտ են առել, մեքենաներ ենն վարձակալել, գործուղումների են գնացել Մալդիվներ և այլն...

4. ՀԷՑ-ի վարկերի մի մասը վերցվել է Կառավարության երաշխիքով։ Այդ դեպքում ո՞վ է պատասխան տալու դրա համար այն առումով՝ թե՛ այդ երաշխիքը տալու որոշման համար, թե՛ այդ վարկը մարելու։

Ու էլի մի վագոն նման հարցեր են պատասխան պահանջում, որոնք հնարավոր են միայն անկախ աուդիտի պարագայում։ Սակայն այդ աուդիտը կարող է այնպիսի բաներ ջրի երես հանել (վստահ եմ դրանում), որ 6.93 դրամի թանկացումը չեղյալ հայտարարելը կարող է երանության գագաթնակետ թվալ իշխանությունների համար։ Դրա համար էլ ասում եմ՝ բա ձեզ պետք ա՞, լուծեք այս հարցը, քանի դեռ ուշ չէ։