Այս անգամ մեզ հետ Դուբայ էինք տարել հարսի ճերմակ քող. Նառա Դիլանյանը նշել է ամուսնության 3-ամյակը (լուսանկարներ)

Life.panorama.am-ը գրում է . 

Շուրջ 18 տարի միասին, որից միայն երեքը` որպես ամուսիններ. Օրերս  դերասանուհի  Նառա Դիլանյանն ու ամուսինը նշել են ամուսնության երեք տարին:

Life.panorama.am-ի հետ զրույցում դերասանուհին պատմել է ամուսնու անակնկալի ու իրենց  ընտանիքի մասին:

«Ճիշտ երեք տարի առաջ՝ հոկտեմբերի 10-ին կայացավ մեր սպասված հարսանիքն ու այդուհետ ամեն հոկտեմբերի 10-ը մեզ համար տոն է, ես եւ ամուսինս փորձում ենք ամեն տարի էլ ավելի հետաքրքիր ու ուրախ անցկացնենք այդ օրը: Այս անգամ ամուսինս ինձ անակնկալ էր արել ու դեպի Դուբայ ուղեւորություն էր նվիրել ամուսնության տարեդարձից մի քանի օր առաջ: Ի դեպ` նշեմ, որ մեր հարսանեկան ճանապարհորդությունը պետք է հենց Դուբայում լիներ, սակայն ինչ-ինչ պատճառներով մենք այլ վայրում անցկացրինք մեր մեղրամիսը: Դե իսկ տարիներ անց, փաստորեն, Հովոն իր խոսքի տերը եղավ ու մենք մեր ամուսնության տարեդարձը  նշեցինք Դուբայում»,- նշեց Նառան:

Մեզ հետ զրույցում դերասանուհին պատմեց նաեւ, որ ամեն տարի իր ամուսնության տարդարձը նշելիս հարսանեկան որեւէ ատրիբուտով լուսանկարվում է, ի դեպ` այդ ավանդույթն իր հատուկ պատմությունն ունի.

«Անկեղծ ասած` երեք տարի առաջ, երբ պետք է հարսի զգեստ ընտրեի ինձ համար, ես այդպես էլ չգտա ճերմակ մի զգեստ, որն ըստ իս ՝ սազեր ինձ, արդյունքում ընտրեցի հարսի զգեստ, բայց ոչ ճերմակ: Այդուհետ որոշում կայացրեցի, որ ամեն տարի մեր հարսանիքի օրը հարսանեկան որեւէ ատրիբուտ եմ կրելու: Այս անգամ մեզ հետ Դուբայ էինք տարել հարսի ճերմակ քող, որով էլ մի քանի գեղեցիկ լուսանկարներ ունեցա: Ի դեպ` մեր գնալու օրը Հովոն հյուրանոցում տեղեկացրել էր, որ մեր ամուսնության երեք ամյակի կապակցությամբ ենք ճանապարհորդում, ու նրանք մեզ համար շատ գեղեցիկ անակնկալ էին մատուցել մեր սենյակում: Շատ հաճելի է, երբ ամուսինդ հոգ է տանում, որպեսզի քեզ կատարյալ երջանիկ կին զգաս, նա անգամ ծովափում ինձ ծաղիկներ նվիրեց, որով կրկին ինձ բազում հաճելի պահեր պարգեւեց: Նշեմ նաեւ, որ անակնկալները այդքանով չէին եզրափակվել, մենք մոլերից մեկում հարս ու փեսա արջուկ խաղալիքներ տեսանք ու ես որոշեցի անպայման գնել դրանցից մեկը, (երկուսը միասին բավականին թանկ արժեին), եւ երբ ես երկար տատանվելուց հետո ի վերջո գնեցի հարսիկ արջուկին, այդ խանութում որոշեցին, որ փեսա արջին ինձ են նվիրելու»,- ժպիտով նկատեց նա:

Ի դեպ` Նառան շեշտեց, որ շատ շնորհակալ է Դուբայում ապրող իր հայ ընկերներին, որոնց շնորհիվ դերասանուհին ու ամուսինը կարողացել են ամբողջությամբ վայելել Դուբայը.

«Նախ պետք է նշեմ, որ հայերը դրսում միմյանց հանդեպ շատ սրտացավ էին, մեր հյուրանոցում եւս չորս հայեր կային ու մենք անկախ մեզնաից մտերմացանք, իրար հանդեպ շատ սրտացավ դարձանք, այնպես, որ ծովափում հենց չէինք տեսնում իրար, անմիջապես խառնվում ու իրար էինք փնտրում: Նաեւ ես ու Հովոն ծանոթանաք այնտեղ ապրող մի հայ ընտանիքի հետ, որոնք դարձան մեզ համար հարազատ ընկերներ: Շնորհակալ եմ նրանց, որ թողեցին բոլոր գործերն ու իրենց մի քանի օրը մեզ նվիրեցին»:

Խոսելով ամուսնու տեսակից ու հետաքրքրվելով, թե նա՞ է արդյոք ամուսնուն «վարակել» իր ուրախ տեսակով` դերասանուհին պատմեց.

«Ինչ խոսք, տարիների ընթացքում մենք նմանվել ենք իրար: Քիչ չէ 18 տարին, որից տասը տարին ընկերություն ենք արել, հինգը` նշանված ենք եղել ու դեռ երեք տարի է, ինչ ամուսնացած ենք: Կարծես թե մի ամբողջ կյանք միասին ենք ու երկուսս էլ իրարից որոշ բաներ վերցրել ենք: Սակայն մի բան հաստատ է, եթե նրա մեջ չլիներ այդ տեսակը, հաստատ որքան էլ ես ցանկանայի, ինձ չէր նմանվի: Ավելին ասեմ` Հովոյի մեջ ավելի շատ է կյանքը եռում, օրինակ Դուբայում մենք առավոտյան դուրս էինք գալիս հյուրանոցից ու վերադառնում էինք գիշերը չորսին, այն էլ վերադառնում էինք, որովհետեւ ես էի հոգնում, թե չէ, եթե Հովոյին մնար, կշարունակեր զբոսնել: Ուրախ եմ, որ ես ու Հովոն ճիշտ ու իրար լրացնող զույգ ենք, մենք գիտենք` ինչ ենք ուզում կյանքից»:

Իսկ թե ինչպե՞ս է դերասանուհին կարողանում պահպանել մշտապես բարձր տրմադրությունը, պարզաբանեց.

«Մեր կյանքը շատ սեւ ու սպիտակ է, որ փնտրենք, ամեն օր էլ կգտնենք տխրելու առիթներ, բայց ի՞նչ օգուտ դրանից: Ես փորձում եմ հնարավորինս ուրախ ապրել կյանքս, փոքրիկ բաներից ուրախանալ, ամեն մանրուք տոն դարձնել: Այսպես կյանքն ավելի գեղեցիկ է, ավելի հաճելի, էլ չասեմ, որ ուրախ ապրելն առողջարար է»:

Հեղինակ` Անուշիկ Մելքոնյան