Հայ գիտնականն ուսումնասիրում է հակաքաղցկեղային դեղամիջոցը կրկնակի արդյունավետ դարձնելու հնարավորությունը

Դոքսորուբիցին հակաքաղցկեղային դեղամիջոցի նոր կոմպոզիտները կարող են կրկնակի մեծացնել դրա արդյունավետությունը։ Այս մասին NEWS.am–ի  հետ զրույցում ասել է ֆիզիկա–մաթեմատիկական գիտությունների թեկնածու, Հայաստանի ազգային ճարտարագիտական համալսարանի ռենտգենակառուցվածքային հետազոտությունների բազային լաբորատորիայի վարիչ Էմմա Առաքելովան։

Դեղամիջոցը կատարելագործելու համար գիտնականների թիմը Առաքելովայի գլխավորությամբ կազմել է ցինկի օքսիդի հետ դրա կոմպոզիտային միացությունները։ Դրա համար ZnO նանոչափական թաղանթով  (180 նանոմետր հաստությամբ) ծածկել են դեղամիջոցը։

Միացությունը փորձարկել են Էրլիխի կարցինոմով մկների վրա։ in vitro (լաբորատոր) եւ in vivo (կենդանիների վրա) փորձերն ընթացել են Օրգանական եւ դեղագործական քիմիայի կենտրոնում եւ Հայաստանի ԳԱԱ Մոլեկուլյար կենսաբանության ինստիտուտում։

Մկները, որոնց ցինկի օքսիդի կոմպոզիտային թաղանթով դեղ են ներարկել, կրկնակի երկար են ապրել։ Իսկ դեղամիջոցը կրկնակի պակաս են ներարկել, քանի որ թաղանթում ցինկի օքսիդը օգնում է այն նպատակային հասցնել ուռուցքով ախտահարված հյուսվածքին։

«Բնականաբար, որքան քիչ է դեղի չափաբաժինը, այնքան քիչ են դրա կողմնակի հետեւանքները։ Սակայն անգամ կրկնակի փոքր չափաբաժնով թաղանթը կրկնակի շատ քաղցկեղային բջիջներ է սպանել»,– պարզաբանում է Առաքելովան։

Ցինկի օքսիդով կոմպոզիտը գիտնականները ստացել են եւ փորձարկել են թաղանթի եւ հիդրոգելի վիճակում։ Պլանավորվում է ստանալ նաեւ լիոֆիլիզացված (սառեցրած–չորացրած) փոշու ձեւով։

Հետազոտություններն ընթացել են Միջազգային գիտատեխնիկական կենտրոնի աջակցությամբ։ Արդյունքները ներկայացրել են Երեւանում DigiTec Expo – 2016 ցուցահանդեսի ժամանակ։