Ակտիվիստները Վ.Օսիպյանին հայտնեցին, որ հայտնաբերել են երկու արկղ գարեջուր
Մամուլ
Վերջին մեկ ժամում իրավիճակը Բաղրամյան պողոտայում փոքր ինչ լարվել է,- հայտնում է Orer.am-ը:
Քիչ առաջ ցուցարարները Հայաստանի բնակչությանը կեղեքողների ու թալանչիների ճոխ թաղում կազմակերպեցին: Նկատենք, որ պատվիրված պսակը նետվեց ցուցարարների ու ոստիկանների միջեւ գտնվող նեյտրալ տարածքում:
Տեղեկացնենք, որ չնայած եղանակային պայմաններին՝ ցուցարարները մնում են տեղում՝ գործի դնելով հնարավոր բոլոր միջոցները արեւից եւ անձրեւից պաշտպանվելու համար: Հավելենք նաեւ, որ այս վեց օրերի ընթացքում թե՛ Ազատության հրապարակում, եւ թե՛ Բաղրամյան պողոտայում ցուցարարներն իրենք են հոգացել իրենց խնդիրները՝ փորձելով հնարավորինս մաքուր պահել տարածքը:
Քիչ առաջ Բաղրամյան պողոտա էր բերվել «Սանիթեք» ընկերության մեքենան, որը պետք է իրականացներ աղբահանություն, բայց ակցիայի մասնակիցներից մի քանիսը, բարձրանալով մեքենայի վրա, թույլ չտվեցին մեքենային առաջ շարժվել: Տեղի ունեցածից հետո Երևանի փոխոստիկանապետ Վալերի Օսիպյանը հայտնեց, որ աղբահանություն իրականացնող ընկերությունն հրաժարվում է տարածքը մաքրելուց, և ցուցարարներն այսուհետ իրենք պետք է իրականացնեն տարածքի աղբահանությունը:
Նշենք, որ ոստիկան-ցուցարար հարաբերությունները բավական հանգիստ են, ավելին՝ այս պահին Բաղրամյան պողոտա է կրկին ժամանել ոստիկանապետ Վլադիմիր Գասպարյանը, իսկ ժողովրդի հոսքը դեպի ցուցարարները շատանում է:
Հարկ ենք համարում տեղեկացնել նաեւ, որ այս պահին նախաձեռնության անդամները զրուցում են Վալերի Օսիպյանի հետ: Պարզվում է, որ ակտիվ քաղաքացիների դեմ ընտրված շանտաժի միջոցը մինչ օրս գործում է: Ակցիայի մասնակիցները ոստիկանության աշխատակիցներին հայտնեցին, որ տարածքում երկու արկղ գարեջուր են հայտնաբերել, որոնք սակայն ակցիայի մասնակիցներինը չեն: Վ.Օսիպյանը շնորհակալություն հայտնեց ոստիկանների հետ համագործակցության համար ու հավելեց, որ կզբաղվի տվյալ խնդրով: Նա նաեւ տեղեկացրեց, որ գիշերը ոստիկանների կողմից առգրավված ջրի շշերի մեջ հայտնաբերվել է ալկոհոլային խմիչք:
Հայտնենք, որ նախաձեռնության անդամները այսօր ողջ օրվա ընթացքում Facebook սոցիալական կայքով տեղեկություն էին տարածում այն մասին, որ անհայտ անձանց կողմից ակցիայի մասնակիցներին բաժանվում են կասկածելի պարունակություն ունեցող ջրեղեն եւ ուտելիք: Նրանք հորդորում էին անձամբ կատարել գնումներ՝ չվստահելով անծանոթներին:
Սոսե Չանդոյան
1
2
3
4
5
1
2
3
5
1
2
3
4
5
