«Հայաստանի և Ադրբեջանի նախագահների միջև հանդիպումները պետք է արդյունք ունենան»

Օրերս ԵԱՀԿ Մինսկի Խմբի ԱՄՆ-ի համանախագահ Ջեյմս Ուորլիքը հայտարարել էր, որ համանախագահները հույս ունեն, որ Հայաստանի և Ադրբեջանի նախագահները համաձայնության կգան հերթական հանդիպման շուրջ:

«Երկու երկների բարձր մակարդակով հանդիպումները պետք է արդյունք ունենան, այսինքն` նախագահների միջև ձեռք բերված պայմանավորվածությունները պիտի իրագործվեն: Անիմաստ եմ համարում հանդիպումները հանուն հանդիպումների: Մայիսի 16-ին Վիեննայում Հայաստանի և Ադրբեջանի նախագահները Մինսկի Խմբի շրջանակներում կազմակերպված գագաթաժողովի արդյունքում ստորագրեցին համտեղ հայտարարություն, որով նախատեսվում էր հրադադարի ռեժիմի պահպանում, ԵԱՀԿ գործող նախագահ Անջեյ Կասպրշիկի լիազորությունների ընդլայնում, հրադադարի ռեժիմի խախտման դեպքերի հետաքննության մեխանիզմների ներդրում, ինչը չիրականացվեց»,- Shabat.am-ի հետ զրույցում կարծիք հայտնեց քաղաքագետ, Գլոբալիզացիայի և տարածաշրջանային համագործակցության կենտրոնի ղեկավար Ստեփան Գրիգորյանը:

Քաղաքագետը միաժամանակ ընդգծում է, որ ԵԱՀԿ Մինսկի Խումբը կարևոր առաքելություն ունի և նրա աշխատանքը հարկավոր է դրական գնահատել. «Մինսկի Խումբը փորձում է հակամարտության կողմերի միջև հանդիպումներ կազմակերպել, աշխուժացնել, վերականգնել բանակցային գործընթացը: Համանախագահների ջանքերը հարկավոր է գնահատել: Նրանց այցերը տարածաշրջան, հանդիպումները հայկական, ադրբեջանական և ղարաբաղյան կողմերի հետ կարևոր նշանակություն ունեն: Սակայն չի կարելի միամտությամբ կարծել, որ այդպիսով հնարավոր է Լեռնային Ղարաբաղի հակամարտությունը լուծել, մանավանդ Ապրիլյան պատերազմի, ադրբեջանական կողմի՝ հրադադարի ռեժիմի շարունակական խախտման համատեքստում»:

Անդրադառնալով այն տեսակետին, թե ղարաբաղա-ադրբեջանական շփման գծում Ադրբեջանի կողմից վերջին շրջանում իրականացվող ակտիվ սադրանքները պայմանավորված են Ադրբեջանում Սահմանադրական փոփոխությունների հանրաքվեից սե"փական ժողովրդի ուշադրությունը շեղելու Ալիևի փորձերի հետ, քաղաքագետն ընդգծում է. «Ես կկիսեի այդ կարծիքը, եթե այդ լարվածությունը լիներ մինչ Սահմանդրական փոփոխությունների հանրաքվեն: Իսկ նոր սրացումը մենք կանխատեսել էինք դեռևս ամիսներ առաջ՝ նշելով, որ հոկտեմբերի վերջին և նոյեմբերի առաջին շաբաթվա ընթացքում հնարավոր է Ադրբեջանը կրկին գնա նոր սադրանքների: Դա պայմանավորված է նրանով, որ Ադրբեջանը չի ցանկանում իրականացնել Վիեննայում ձեռք բերված

պայմանավորվածությունները՝ ձգտելով Հայաստանին մղել միակողմանի զիջումների: Ադրբեջանը հավատարիմ է մնում իր նախապայմանային քաղաքականությանը` ասելով, որ Հայաստանը պետք է ազատի գրավյալ տարածքները և ապա տեղի ունենան բանակցություններ»:

Գրիգորյանը նշում է. «Մեծ պատերազմի հավանականություն չեմ տեսնում, սակայն նոր սրացումներ կարող են լինել: Գուցե հակառակորդը հարվածի մի ուղղությամբ, փորձի մի գյուղ կամ մի քանի բարձունքներ վերցնել` կրկին ուշադրություն գրավելով Ղարաբաղի հարցի վրա: Միաժամանակ Ադրբեջանը գիտակցում է, որ չի կարողանա հանկարծակկի բերել հայական կողմին և հաջողության հասնելը նրա համար շատ բարդ կլինի: