Խաղադրույք մի կատարեք, որ ժողովրդի նյարդերը տեղի կտան ձեր կողմից խնդրի լուծումը ձգձգելու պատճառով

Գարիկ Պետրոսյանը ֆեյսբուքյան իր էջում գրում է.

Ամեն պատեհ ու անպատեհ առիթի իշխանական ու մերձիշխանական շրջանակների ներկայացուցիչները իրենց սերն են հայտնում ժողովուրդի հանդեպ: 

Մեկ շաբաթ շարունակ ժողովուրդը փողոցում կանգնած պահանջում է չեղյալ համարել այդ նույն իշխանության անատամության պատճառով կայացված որոշումը: Մեկ շաբաթ շարունակ ցուցարարները մի կողմից պայքարում են անօրինականության դեմ, մյուս կողմից առավելագույն զգոնություն են ցուցաբերում, որպեսզի որևէ սադրիչ չկարողանա ստվեր գցել մինչ օրս բարձր մակարդակով կազմակերպված ընդվզման վրա: 

Ի՞նչ է արել իշխանությունը այս օրերի ընթացքում: Վերին էշելոնի քար լռություն և հրաման կատարողների կողմից խայտառակ ակցիա ջրցան մեքենաների ուղեկցությամբ: Այ ձեր տունը շինվի, մենք հո Տղմուտի ափին չէի՞նք որ ձեր փղերով հարձակվեցիք էդ երիտասարդների վրա: 

Ակցիայի մասնակիցների մեծամասնությունը աշխատող մարդիկ են, բայց այսօր առաջնայինը համարում են արդարացի պահանջի վերջնական լուծման համար պայքարը, իսկ ձեր բան ու գործի անունը ի՞նչ է: Էդ ի՞նչ ավելի կարևոր գործերով եք զբաղված, որ օրեր շարունակ չեք նկատում ժողովրդին: Հիշեք այս օրերը, հիշեք, թե որքան եք հարգում ժողովրդին, որ վաղը մյուս օր գոնե ամոթից լռեք: Չնայած ոչ վաղ անցյալում ընդամենը մեկ շաբաթվա տարբերությամբ նույն երևույթի մասին ուղղահայացորեն հակադիր կարծիք հայտնող մարդը ինչ գիտի, թե թասիբն ու պատիվը ինչ են: Հիմա էլ էժանագին տրյուկներ եք ուզում օգտագործեք` շիշ, միշ, գարեջուր, քար,ֆլան, ֆստան :Մարդիկ այս օրերի ընթացքում ապացուցեցին, որ ոչ մեկի գրպանում ատոմային ռումբ չկա ու կարիք չկա անընդհատ կեղտ փնտրել: Շատ ավելի լավ է ինքներդ ձեզ ստիպեք, որ արագ որոշում կայացնեք, որպեսզի մարդկանց համբերության բաժակը չլցվի: 

Այս անգամ ձեր հաշվարկները ձեզ կհիասթափեցնեն: Ժողովրդի նյարդերը տեղի չեն տալու խնդրի լուծումը ձգձգելու պատճառով: ՈՒղղակի, երբ պահը բաց թողնեք ու հարցին լուծում չտաք, ապա վաղը նոր պահանջ կառաջադրվի, որի լուծումը այլևս ձեզանից կախված չի լինի