Սա միայն հանրության դժգոհություն չէ, սա հայ ազգի պայքարն է արդարության համար. Հարություն Մեսրոբյան

Tert.am-ը գրում է.

Tert.am-ի հետ զրույցում կառավարման փորձագետ Հարություն Մեսրոբյանը, անդրադառնալով էլեկտրաէներգիայի թանկացման դեմ պայքարող «Ո՛չ թալանին» նախաձեռնությանը, ասաց, թե այս պահի դրությամբ այդ պայքարի մեջ կան տարատեսակ միտումներ.  միտումների մի մասը դրական է, մի մասը՝ բացասական:

-Պարո՛ն Մեսրոբյան, կմասնավորեցնե՞ք, թե որոնք են դրական, որոնք՝ բացասական միտումները:

-Դրականներից կարող եմ ասել, որ բավականին լավ ներքին կազմակերպվածություն կա, աշխատում են հարգալից վերաբերվել, տարածքը մաքուր պահել և այլն, այսինքն՝ հայ ազգին բնորոշ հատկություններն այնտեղ արտահայտվում են: Դա ինձ հիշեցնում է 1988 թվականի փետրվարյան հանրահավաքները, որտեղ նույնպես ուշադիր աշխատում էին նույնիսկ մայթերի ոչ մի խոտ չտրորել: Ուզում եմ ասել, որ ազգային այդ առողջ ավանդույթները շարունակվում են: Աշխատում են հնարավորինս զերծ մնալ որևէ սադրանքներից, այսինքն՝ այս երևույթի սահմանները փորձում են հսկել, սա էլ շատ կառուցողական մաս է: Աշխատում են, որ պրոցեսը  բնականոն զարգանա, ոչ արագացնում են, ոչ՝ դանդաղեցնում: Կառավարման իմաստով սա դրական երևույթ է:

Բացասական միտումներից մեկն այն է, որ շատերը սեփական PR-ով ու սելֆիներով հեղեղել են համացանցը և ԶԼՄ-ները: Տեղի է ունենում, որը մի պրոցես, որը ցույց է տալիս, որ ինչ շահեր են պտտվում այս երևույթի շուրջ: Դրա համար եմ ասում, որ դեռ վաղ է ամփոփիչ եզրակացություն անել, որովհետև բոլոր նրանք, ովքեր հիմա խոսում են, նկարահանվում են, կարծիքներ են հայտնում այս երևույթի հետ, ունեն շահեր, որոնց զգալի մասը զուտ օգտագործելն է, այդ թվարկածի միայն փոքր մասն է, որ ունեն մտահոգություն: Սոցցանցերում հնչող կարծիքների 90%-ը շահադիտական նպատակով է, իսկ դա նշանակում է, որ տարբեր ուժեր իրենց հետաքրքրությունների միջոցով ամեն ինչ կանեն, որպեսզի դոմինանտ լինեն այս շարժման մեջ և ամբողջ պրոցեսը տանեն իրենց շահերը բավարարելու ուղղությամբ: Հաջորդ բացասական միտումն այն է, որ այդ հուզիչ երևույթների վրա շատ ուշադրություն է դարձվում: Մարդկայնորեն ես դա հասկանում եմ, բայց որպես կառավարման ոլորտի մասնագետ դրան հանգիստ եմ նայում, բայց ոչ մի գնահատական չեմ տալիս: Սակայն բանը կայանում է նրանում, որ գնալ էմոցիաների հետևից, երբ քո կողքն են, պտտվում են բազմաթիվ իրարամերժ և ինչու չէ՝ ազգի համար վտանգավոր շահեր, մեր էմոցիաները վտանգավոր կլինեն այն ժամանակ, երբ ուժեր կլինեն, որոնք կօգտագործեն այդ հուզիչ մասը, ցասումն իրենց շահերի օգտին տանելու համար: Սա շատ վտանգավոր է:

-Ակցիայի ընթացքում ցուցարարների կողքին են հայտնում տարբեր քաղաքական ուժերի ներկայացուցիչներ, ինչին ի պատասխան նախաձեռնության անդամները չուզեցին քաղաքականացնել պայքարը, չցանկացան, որ իրենց առաջնորդեն քաղաքական գործիչները:

-Այստեղ համամիտ եմ ակտիվիստների հետ. շուրջ 24-25 տարին բավական ժամանակ էր, որպեսզի քաղաքական ուժերը որոշակի կշիռ հավաքեին ժողովրդի աչքերում: Հիմա 2015 թվականն է, և մենք չենք կարող նշել մի քաղաքական ուժ, որը վստահություն ներշնչի ժողովրդի աչքերում: Սա արդեն քաղաքական ուժերի խնդիրն է: Հետևաբար, բնական է, որ այս ակցիան իրենք կօգտագործեն իրենց հեղինակությունը բարձրացնելու համար:Այդուամենայնիվ, կուզենայի խորհրդի կարգով մի քանի մտավախություններ հայտնել. նախ, ինձ դուր չի գալիս, որ շեշտում են «քաղաքացի» բառը: Հայերը վաղուց դարձել են ցանցային ազգ, և եթե մենք շեշտում ենք «քաղաքացի» բառը, ուրեմն մենք խոսում ենք հայության առավելագույնը 20 տոկոսի մասին, որովհետև ՀՀ քաղաքացիություն ունեն հայության առավելագույնը 20 տոկոսը: Հայ ազգը հերթական անգամ դուրս է գալիս արդարության պայքարի և պետք չէ բաժանարար գծեր տանել ՀՀ քաղաքացիների և ոչ ՀՀ քաղաքացիների միջև: Դա անընդունելի է:

Երկրորդն այն է, որ դրական միտումներ եմ նկատում, որ ազգային պարեր, երգեր սկսեցին կիրառել որպես ոգեկոչող երևույթ: Դա նորմալ է, որովհետև սա միայն քաղաքացիական պայքար չէ, սա հանրություն կոչեցյալի դժգոհություն չէ, սա հայ ազգի արդարության համար պայքար է:

Եթե մենք իրոք գտնենք այդ ազգային կեցվածքը և ազգային նպատակները, որտեղ էլեկտրաէներգիան դրա մասնակի դեմքն է, այդկերպ մեր ազգային շահը կսկսի բյուրեղանալ, և այդ տարբեր ներքին ու արտաքին ուժերի ախորժակը կսկսի նվազել: Իսկ եթե մենք չգնանք այդ ճանապարհով, ապա միայն քնած մարդը մոլորակում քիթը չի խոթի այդ ընդվզման մեջ: