Համազգային թատրոնից գողություն կատարած ուսանողները գրավի դիմաց ազատ են արձակվել

Սոս Սարգսյանի անվան համազգային թատրոնից ապրիլի 24-ին կատարված կողոպուտի գործով նախաքննությունն ավարտվել է եւ գործն ուղարկվել դատարան:

Ըստ մեղադրական եզրակացության՝ Բաբկեն Շահբազյանը նախնական համաձայնության է եկել Գոռ Մնացականյանի հետ` Հայկ Սմբատյանի օժանդակությամբ եւ ապօրինի մուտք են գործել Սոս Սարգսյանի անվան համազգային թատրոն: Այնուհետեւ ուղղակի դիտավորությամբ կատարել են ուրիշի գույքի գաղտնի հափշտակություն` խոշոր չափերով:

Բաբկեն Շահբազյանին եւ Գոռ Մնացականյանին մեղադրանք է առաջադրվել Քրեական օրենսգրքի 177-րդ հոդվածի 2-րդ մասի 1, 2, 3 կետերով, իսկ Հայկ Սմբատյանին՝ 38-177-րդ հոդվածի 2-րդ մասի 1, 2, 3 կետերով: Նրանք գրավի դիմաց ազատ են արձակվել:

Գործը քննվում է Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում:

Ավելի վաղ ոստիկանությունը հաղորդագրություն էր տարածել, որ 2016թ. ապրիլի 24-ին ժամը 06:00-ի սահմաններում երեք երիտասարդ ապօրինի մուտք են գործել Երեւանի Ամիրյան 26 հասցեում գտնվող «Սոս Սարգսյանի անվան համազգային թատրոն» ՊՈԱԿ-ի շենք, որտեղից հափշտակել են կիթառ՝ իր պատյանով, 2 համակարգիչ, ՊՈԱԿ-ին պատկանող գումար, տարբեր այլ իրեր ու դիմել փախուստի, երբ տեսել են, որ թատրոնի պարետն իրենց նկատել է:

Վեց օր անց ոստիկաններին հաջողվել էր պարզել, որ հիշյալ կողոպուտը կազմակերպել եւ իրականացրել էին Կինոյի եւ թատրոնի պետական ինստիտուտի ուսանողներ, 21-ամյա Գոռ Մնացականյանը, 22-ամյա Հայկ Սմբատյանն ու 21-ամյա Բաբկեն Շահբազյանը: Նրանք կալանավորվել էին: