6 ժամկետային զինծառայողների գործով դատաքննությունը սկսվել է

Սյունիքի մարզի զորամասերից մեկում վաշտի հրամանատարին ծեծելու մեջ մեղադրվող 6 ժամկետային զինծառայողների գործով դատաքննությունը սկսվել է: Այս մասին NEWS.am-ի հետ զրույցում ասաց նրանցից  Արման Միքայելյանի պաշտպան Մարիամ Մկրտչյանը՝ նշելով, որ դատական առաջին նիստը հետաձգվել է:

«Հրամանատարները չէին ներկայացել, ոչ էլ տուժողը, գրություն էին ուղարկել դատարան: Մենք հայտարարեցինք, որ պետք է այնպես անել, որ եթե անգամ իրենց չեն գալիս, գոնե տուժողն ու այլ ներկայացուցիչ ներկայանա նիստին, քանի որ մեղադրյալների ծնողների որոշ մասը հեռվից են գալիս, մի քանի հարյուր կիլոմետր են անցնում»,- ասաց նա՝ նշելով, որ եթե կրկնվի, կարելի է ասել, որ միտում կա հրամանատարների կողմից:

Քրեական գործը գտնվում է ՀՀ Սյունիքի մարզի ընդհանուր իրավասության առաջին ատյանի դատարանի վարույթում: Առաջին նիստը կայացել է հոկտեմբերի 5-ին:

Ժամկետային զինծառայողները՝ Յուրի Հովհաննիսյանը, Արման Միքայելյանը, Վազգեն Մխեյանը, Արսեն Հակոբյանը, Հարություն Ասատրյանը եւ Հակոբ Վարդանյանը կալանավորված են: Ըստ մեղադրանքի նրանք զինվորական ծառայության պարտականությունները կատարելու կապակցությամբ ծեծել են իրենց նկատմամբ պետ հանդիսացող կապիտան Կ. Խաչատրյանին:

Փաստաբաններն ահազանգել են, որ եղել է քաշքշուք, ինչի ժամանակ տղաներից Արման Միքայլյանը ավելի լուրջ վնասվածքներ է ստացել, քան սպան, սակայն հայտնվել է մեղադրյալի կարգավիճակում: Ըստ փաստաբանների՝ նախաքննական մարմինը այլ կերպ է ներկայացրել տեղի ունեցածը եւ 6 զինծառայողներին մեղադրանք առաջադրել 5-10 րոպե սպային ծեծելու համար, այնինչ նման բան չի եղել:

Կապիտան Կարեն Խաչատրյանը այս տարվա մայիսին պայմանական ազատազրկման է դատապարտված՝ 1 տարի փորձաշրջանով: Նա մեղավոր է ճանաչվել, որ հրաժարվելով իր վրա դրված զինվորական ծառայության առանձին պարտականությունները կատարելուց,առանց թույլտվության չի ներկայացել զորամաս, ինչը զուգորդվել է զինվորական առանձին պարտականությունների կատարման փաստացի դադարեցմամբ: Բացի այդ՝ նա ինքնակամ լքել է դիտակետը եւ վերադարձել հաջորդ օրը:b