Ժիրայր Սեֆիլյանն ընդդեմ «Արմենիա» TV-ի գործով նիստը հետաձգվել է

Այսօր Աջափնյակ եւ Դավթաշեն վարչական շրջանների ընդհանուր իրավասության դատարանում դատավոր Նաիրա Ավետիսյանի նախագահությամբ սկսվել եւ հետաձգվել է «Նոր Հայաստան» հանրային փրկության ճակատի առաջնորդ Ժիրայր Սեֆիլյանն ընդդեմ «Արմենիա TV» -ի գործով առաջին դատական նիստը: Այս մասին մեր զրույցում ասաց Սեֆիլյանի շահերի ներկայացուցիչ Տիգրան Հայրապետյանը:

«Արմենիա» հեռուստաընկերությունը միայն այսօր էր դատարան ուղարկել հայցադիմումի վերաբերյալ պատասխանը, եւ դատարանը հետաձգեց դատական նիստը՝ հնարավորություն տալով հայցվոր կողմին ծանոթանալու դրա հետ:

Ժիրայր Սեֆիլյանն ընդդեմ «Արմենիա TV» -ի քաղաքացիական հայց է ներկայացրել՝ հեռուստաընկերությունից պահանջելով իր վերաբերյալ տարածված կեղծ տեղեկությունները հերքել, ինչպես նաև իրենից հրապարակային ներողություն խնդրել:

Հիշեցնենք Սեֆիլյանի ձերբակալությունից օրեր առաջ՝ հուլիսի 12-ին «Արմենիա TV-ի «Սուր անկյուն» հաղորդման շրջանակներում ցուցադրվել է մի տեսանյութ, որում ասվում է, թե Սեֆիլյանն արցախյան ազատամարտի տարիներին, լինելով հրամանատար, մարտի դաշտում է թողել վիրավոր զինվորներից մեկին ու որոշում կայացրել այնտեղ եղած երկու ձիերից մեկը ՝ նստելով՝ հեռանալ: Ըստ տեսանյութի՝ մարտի դաշտում թողնված վիրավոր զինվորը մահացել է: Ժիրայր Սեֆիլյանի ներկայացուցիչ Տիգրան Հայրապետյանի՝ ասվածը չի համապատասխանում իրականությանը եւ արատավորում է ազատամարտիկի պատիվն, արժանապատվությունն ու գործարար համբավը: