«Հայկական վերածնունդ» կուսակցությունը Վանաձորում կպաշտպանի Քրիստ Մարուքյանի թեկնածությունը

Այսօր «Հայկական վերածնունդ» կուսակցության նախագահ Արթուր Բաղդասարյանը կուսակցության կենտրոնական գրասենյակում հանդիպել է «Լուսավոր Հայաստան» կուսակցության նախագահ Էդմոն Մարուքյանին եւ «Լուսավոր Հայաստան» կուսակցության Վանաձոր քաղաքի ավագանիների ցուցակը գլխավորող Քրիստ Մարուքյանին:

Հանդիպման ընթացքում քննարկվել են Վանաձորի քաղաքապետի առաջիկա ընտրության ժամանակ քաղաքապետի թեկնածուի համատեղ պաշտպանության եւ երկու կուսակցությունների կարճաժամկետ եւ երկարաժամկետ համագործակցության հարցերի լայն շրջանակ:

Այնուհետեւ «Հայկական վերածնունդ» եւ Լուսավոր Հայաստան կուսակցությունների` վերջին օրերի երկարատեւ բանակցությունների արդյունքները ՀՎԿ առաջնորդ Արթուր Բաղդասարյանը ներկայացրել է ավելի ուշ տեղի ունեցած ՀՎԿ կառավարման խորհրդի արտահերթ նիստի քննարկմանը:

Քննարկման արդյունքում՝

Վերահաստատելով «Հայկական վերածնունդ» կուսակցության նախագահ Արթուր Բաղդասարյանի մշտապես հնչեցրած թեզը, որ Հայաստանում պետք է ձեւավորվեն իրական քաղաքական կոալիցիաներ, երբ դրանցում ընդգրկված քաղաքական ուժերը պետք է վճռորոշ ազդեցություն ունենան որոշումների կայացման վրա,

Հիմք ընդունելով «Հայկական վերածնունդ» կուսակցության նախկինում արված հայտարարություններն առ այն, որ Հայաստանում անհրաժեշտ է ընդդիմադիր քաղաքական ուժերի լայն կոնսոլիդացիա,

Հաշվի առնելով Վանաձոր քաղաքում տեղի ունեցած ավագանու ընտրությունների արդյունքում ընդդիմադիր եւ իշխանական քաղաքական ուժերի ստացած քվեների հարաբերակցությունը եւ նկատի ունենալով, որ ընտրությունների արդյունքում ընդդիմադիր քաղաքական ուժերը միասին ստացել են վանաձորցիների քվեների մեծամասնությունը,

Հաշվի առնելով եւ հարգելով վանաձորցիների կատարած ընտրությունը ինչպես նաեւ կարեւոր համարելով Հայաստանում փոփոխություններ կատարելու հրամայականը,

«Հայկական վերածնունդ» կուսակցությունը որոշում կայացրեց Վանաձորի քաղաքապետի ընտրություններում աջակցել եւ պաշտպանել «Լուսավոր Հայաստան» կուսակցության կողմից առաջադրված Քրիստ Մարուքյանի թեկնածությունն, ինչը կամրագրվի «Հայկական վերածնունդ» եւ «Լուսավոր Հայաստան» կուսակցությունների միջեւ հետագա քաղաքական համագործակցության վերաբերյալ համաձայնագրով: