«Ժամանակ». Յուրի Խաչատուրովը կդառնա՞ ՀՀԿ-ի նոր թեւ

«Ժամանակ» թերթը գրում է. «Զինված ուժերի գլխավոր շտաբի նախկին պետ Յուրի Խաչատուրովին ներկայացնելով ԱԽ քարտուղարի նոր պաշտոնում՝ Սերժ Սարգսյանն ընդգծել է, որ Խաչատուրովը փաստորեն այլեւս հանդես է գալու քաղաքական գործչի կարգավիճակում:

Եթե Սերժ Սարգսյանը հարկ է համարում ընդգծել, որ Խաչատուրովը այլեւս քաղաքական գործիչ է, ապա պետք է եզրակացնել, որ նրա այդ կարգավիճակը ինչ որ կերպ տեղավորվում է ապագա քաղաքական ծրագրավորումների սարգսյանական սցենարներում կամ տարբերակներում:

Զբաղեցնելով ԶՈՒ գլխավոր շտաբի պետի պաշտոնը, Յուրի Խաչատուրովը ուներ ըստ էության ոչ միարժեք ընկալում եւ´ հանրության մոտ, եւ´ բանակում: Այն, որ նա բավական լուրջ դիմակայության մեջ էր պաշտպանության նախարար` արդեն նախկին նախարար Սեյրան Օհանյանի հետ, ըստ էության՝ այլեւս անթաքույց էր: Միաժամանակ, Յուրի Խաչատուրովն, ըստ էության կարողանում էր անմասն մնալ ԶՈՒ բնագավառում կատարվող եւ հանրության համար անընդունելի տարբեր իրողությունների համար պատասխանատվությունից, այդ թվում նաեւ բանակում ողբերգական դեպքերի համար: Դա հաջողվո՞ւմ էր նրան, թե՞ Խաչատուրովը հենց սկզբից գտնվում էր պաշտպանական հովանու տակ: Այդ հովանին Սերժ Սարգսյա՞նն էր, թե՞ Ռուսաստանը: Եվ արդյո՞ք այդ հովանու շնորհիվ չէ, որ Յուրի Խաչատուրովը, ի տարբերություն Սեյրան Օհանյանի, ԶՈՒ-ից հեռացվում է, բայց անմիջապես նշանակվում նկատելի պաշտոնում: Եվ ավելին` Սերժ Սարգսյանի մակարդակով հռչակվում է քաղաքական գործիչ, ինչը հավանաբար մեսիջ է առաջին հերթին իշխող համակարգին, որով Սարգսյանն ազդարարում է Խաչատուրով քաղաքական գործչի մուտքը այդ համակարգ:

Սա նշանակում է, որ ԱԽ նոր քարտուղարի ներքո ամենայն հավանականությամբ կձեւավորվի որոշակի քաղաքական թեւ կամ տիրույթ: Շատ հավանական է, որ Յուրի Խաչատուրովը տեղավորվում է այն «նոր ոգու» շրջանակում, որի մասին Սերժ Սարգսյանը խոսում էր ՀՀԿ խորհրդին ներկայացնելով նոր վարչապետ Կարեն Կարապետյանին: Ըստ ամենայնի՝ Յուրի Խաչատուրովն էլ կլինի «նոր ոգի» օպերացիայի մեկ այլ մասնակից կամ ՀՀԿ նոր ոգի մեկ այլ «ներկրող»: Այսինքն՝ Սերժ Սարգսյանը ՀՀԿ-ում կձեւավորի մրցակցային միջավայր, այսպես ասած՝ «նոր ոգու» մրցակցային «ներկրումներ»: Ընդ որում՝ ակնհայտ է նաեւ, որ ԶՈՒ գլխավոր շտաբի պետն ինքնին թերեւս այդքան էլ հարմար թեկնածու չէ, այդքան էլ մեծ պոտենցիալ չունի ինքնաբավ քաղաքական գործունեության համար, ինչը նշանակում է, որ նա կունենա իր նոր կարգավիճակում ինքնապահպանման համար Սերժ Սարգսյանի աջակցության կարիքը:

Այսինքն՝ ՀՀԿ-ում հավանաբար կձեւավորվի կամ կարող է ձեւավորվել մի նոր տիրույթ` Խաչատուրովի անվան ներքո, որն իրականում բավական կառավարելի կլինի Սերժ Սարգսյանի համար: Ընդ որում՝ Խաչատուրովի քաղաքական գործունեության «արեալն» ըստ ամենայնի կընդգրկի այսպես ասած ուժային բովանդակության տիրույթ՝ փաստացի ՀՀԿ-ի երկրապահական թեւը դնելով արդեն ոչ թե նախկին երկրապահ, ազատամարտիկ կամ դաշտային հրամանատարների, այլ կադրային զինվորականի «հրամանատարության» ներքո: Այդպես, Սարգսյանը ՀՀԿ-ում կարող է փաստորեն ձեւավորել իր համար կառավարելի երկու նոր թեւ` Կարեն Կարապետյանը «տեխնոկրատական-մենեջերական» նոր իմիջով, եւ Յուրի Խաչատուրովի «ուժային» թեւը, որը կլինի երկրապահա-դաշտային թեւի «պրոֆեսիոնալ զինվորական» տրանսֆորմացիան»:

Առավել մանրամասն՝ թերթի այսօրվա համարում