Սերժ Սարգսյանն ընդունել է սկաուտներին (ֆոտո)

Նախագահ Սերժ Սարգսյանն այսօր ընդունել է Համաշխարհային սկաուտական շարժման (ՀԱՇ) Եվրասիա տարածաշրջանի երիտասարդական հերթական ֆորումի եւ համաժողովի պատվիրակությանը, որը Հայաստան է ժամանել հոկտեմբերի 3-9-ը Երեւանում «Սերունդների երկխոսություն» կարգախոսի ներքո անցկացվող ՀԱՇ Եվրասիա տարածաշրջանի երիտասարդական 3-րդ ֆորումին եւ 6-րդ համաժողովին մասնակցելու նպատակով:

Հանրապետության Նախագահը ողջունել է սկաուտներին եւ կարեւորել նրանց երեւանյան հավաքը, ընդգծելով, որ նմանատիպ միջոցառումները լավ հնարավորություն են երիտասարդների ձայնը լսելի դարձնելու, ինչպես նաեւ որոշումների կայացման մեջ նրանց ներգրավելու առումով:

«Ես համարում եմ, որ ձեր կառույցի կողմից որդեգրած քաղաքականությունը՝ հասարակական կյանքի բոլոր բնագավառներում երիտասարդներին ներգրավելու եւ նրանց գործունեությունը խթանելու ուղղությամբ, ամբողջովին համահունչ է մեր երկրի կողմից որդեգրած երիտասարդական քաղաքականությանը: Ես լիահույս եմ, որ ձեր աշխատանքը կլինի արդյունավետ, հնարավորություն կտա է՛լ ավելի սերտ կապեր հաստատելու մեր երիտասարդների եւ երիտասարդական կազմակերպությունների, այդ թվում՝ սկաուտական կառույցի հետ, ինչպես նաեւ ծանոթանալու Հայաստանի պատմամշակութային ժառանգությանը»,-հանդիպման ժամանակ նշել է ՀՀ Նախագահը:

Սերժ Սարգսյանը պատրաստակամություն է հայտնել շարունակել իր աջակցությունը «Աշխարհն ավելի լավը դարձնելու» նշանաբանի ներքո իրենց գործունեությունը ծավալող սկաուտներին՝ կարեւորելով նրանց կողմից տասնամյակներ շարունակ կատարվող աշխատանքը:

Հանդիպման մասնակիցները շնորհակալություն են հայտնել Հանրապետության Նախագահին իրենց գործունեությունը նման բարձր գնահատականի արժանացնելու, աջակցության ու Երեւանում երիտասարդական ֆորումը եւ տարածաշրջանային համաժողովը բարձր մակարդակով հյուրընկալելու հնարավորության համար: