Եթե Վանաձորում 3 ուժերը չմիավորվեն, քաղաքապետին կընտրի ավագանին գաղտնի քվեարկությամբ
Քաղաքականություն
Եթե Վանաձորում ավագանու ընտրություններում 6 տոկոսի շեմը հաղթահարած «Լուսավոր Հայաստան», «Բարգավաճ Հայաստան» եւ «Հայկական վերածնունդ» կուսակցությունները մինչեւ նորընտիր ավագանու առաջին նիստը չմիանան ու չառաջադրեն քաղաքապետի միասնական թեկնածու, ապա այդ նիստին համայնքի ղեկավար կընտրվի գաղտնի քվեարկության միջոցով: Սա սահմանում է տեղական ինքնակառավարման մասին ՀՀ օրենք:
Ըստ այդ օրենքի 24.2 հոդվածի 3-րդ կետի՝ ավագանիների խմբակցությունները կարող են իրենց կուսակցության թեկնածուների ցուցակի առաջին հորիզոնականում տեղ զբաղեցրած անձին առաջադրել որպես համայնքի ղեկավարի թեկնածու:
Ըստ նույն հոդվածի 4-րդ կետի՝ քվեարկությունն անցկացվում է քվեաթերթիկների միջոցով, որոնցում ընդգրկվում են առաջադրված բոլոր թեկնածուները: Ավագանու յուրաքանչյուր անդամ ունի մեկ ձայնի իրավունք:
Եթե առաջադրվել է մեկից ավելի թեկնածու, ապա համայնքի ղեկավար է ընտրվում այն թեկնածուն, որը ստանում է ավագանու անդամների ընդհանուր թվի ձայների մեծամասնությունը: Եթե առաջադրված թեկնածուներից որեւէ մեկը չի ստանում ավագանու անդամների ընդհանուր թվի ձայների մեծամասնությունը, ապա առավելագույն ձայներ ստացած երկու թեկնածուների միջեւ անցկացվում է քվեարկության երկրորդ փուլ: Եթե հավասար ձայների պատճառով հնարավոր չէ պարզել առավելագույն ձայներ ստացած երկու թեկնածուներին, ապա երկրորդ փուլին մասնակցում են նաեւ հավասար ձայներ ստացած մյուս թեկնածուները: Երկրորդ փուլում համայնքի ղեկավար է ընտրվում առավելագույն ձայներ ստացած թեկնածուն: Ձայների հավասարության դեպքում անցկացվում է լրացուցիչ քվեարկություն` քվեաթերթիկում ընդգրկելով միայն հավասար ձայներ ստացած անձանց: Լրացուցիչ քվեարկության արդյունքով ձայների հավասարության դեպքում առավելությունը տրվում է տարիքով ավագին:
Քվեարկության երկրորդ փուլն ու լրացուցիչ քվեարկությունն անցկացվում են անմիջապես հիմնական քվեարկության արդյունքները հրապարակելուց հետո:
Ըստ նույն հոդվածի 7-րդ կետի՝ եթե առաջադրվել է մեկ թեկնածու, ապա նա ընտրվում է համայնքի ղեկավար, եթե նրա օգտին կողմ քվեարկած ձայները ավելի են դեմ քվեարկած ձայների թվից եւ ավելի են ավագանու անդամների ընդհանուր թվի 40 տոկոսից:
Նշենք, որ ըստ օրենքի՝ Գյումրու, Վանաձորի նորընտիր ավագանիների առաջին նիստերն օրենքի ուժով գումարվում են ավագանի ընտրվելու վերաբերյալ որոշման պաշտոնական հրապարակումից հետո` հաջորդ երկուշաբթի օրը:
Հիշեցնենք, որ «Լուսավոր Հայաստան» կուսակցության նախագահ Էդմոն Մարուքյանը կոչ էր արել Վանաձորում «Հայկական վերածնունդ» եւ «Բարգավաճ Հայաստան» կուսակցություններին միանալ եւ առաջադրել քաղաքապետի միասնական թեկնածու:
«Հայկական վերածնունդ» կուսակցությունն իր հերթին հայտարարել է, որ պատրաստ է աջակցել Էդմոն Մարուքյանի առաջարկին, եթե «Լուսավոր Հայաստանը», հաշվի առնելով «Հայկական վերածնունդ» կուսակցության ազդեցության համապետական մակարդակը, առաջիկա համապետական ընտրություններում իր հերթին միանա «Հայկական վերածնունդ» կուսակցությանը, որը հնարավորություն կտա ձեւավորել առավել ուժեղ մրցակցային քաղաքական թիմ ողջ երկրում: Էդմոն Մարուքյանը հայտարարել է, որ չեն ընդունում «Հայկական վերածնունդ» կուսակցության պայմանը:
1
2
3
4
5
1
2
3
1
5
