Վանաձորում մեր թեկնածուն պետք է համագործակցի մյուս քաղաքական ուժերի հետ. Շարմազանով

Հայաստանի hանրապետական կուսակցությունը դրական է գնահատում հոկտեմբերի 2-ին տեղի ունեցած ՏԻՄ ընտրությունների արդյունքները: Այս մասին այսօր՝ հոկտեմբերի 3-ին,NEWS.am-ի հետ զրույցում ասաց ՀՀԿ մամուլի խոսնակ Էդուարդ Շարմազանովը: Նա նշեց, որ կուսակցության համար շատ կարեւոր էր Վանաձոր եւ Գյումրի քաղաքներում ՀՀԿ-ական թեկնածուների հաղթանակը:

«Թե Գյումրիում, թե Վանաձորում  ՀՀԿ-ական թեկնածուները հաջողության հասան, որը լավ հնարավորություն է ապագա խորհրդարանական ընտրություններում հաջողություններ ամրապնդելու համար: Մենք ընդհանուր առմամբ, բավարարված ենք եւ դրական ենք գնահատում ընտրությունները, որովհետեւ 292-ից 190 համայնքում  ՀՀԿ-ի ներկայացուցիչները հաջողության հասան: Կային 1-2 համայնքներ, որտեղ մենք պետք է վերլուծություն կատարենք»,-ասաց նա:

Դիտարկմանը, որ մասնավորապես, Վանաձորում ՀՀԿ-ն չի կարողանալու միանձնյա քաղաքապետ ընտրել, ինչպես է ՀՀԿ-ն լուծելու այդ խնդիրը, Շարմազանաովն արձագանքեց. «Վանաձորի արդյունքները նորմալ ենք գնահատում՝ գրեթե 38 տոկոս, շատ լավ արդյունք է նման ընտրապայքարի մեջ: Մեր ընտրված թեկնածուները պետք է համագործակցեն մյուս քաղաքական ուժերի հետ, ծառայեն վանաձորցիներին, գյումրեցիներին եւ հնարավորինս արագ եւ արդյունավետ լուծեն մեր համաքաղաքացիների խնդիրները: Վանաձորն ու Գյումրին ավանդաբար երկու դժվար քաղաքներ էին իշխանությունների համար, քանի որ նախորդ ընտրություններում իշխանությունը դրական ցուցանիշ չէր արձանագրել այս քաղաքներում: Իսկ Սեւանում կարեւոր էր, որ ՀՀԿ կուսակցությունը ճիշտ ընտրություն կատարեց, մենք վերլուծություն կատարեցինք, հանդիպեցինք թեկնածուների հետ եւ պաշտպանեցինք անկուսակցական Սարգիս Մուրադյանին: Նա երիտասարդ, պայծառ անձնավորություն է, մարդը 3 հազար ձայնից ավելի հաղթեց»:

Էդուարդ Շարմազանովն անդրադառնալով Վանաձորում եւ Գյումրիում «Հայկական վերածնունդ» կուսակցության արձանագրած հաջողությանը, որը հաղթահարել է 6-տոկոսանոց շեմը, նշեց, որ այդ հաջողությունները պայմանավորված են եղել ոչ թե կուսակցությունով, այլ անձերով եւ տվյալ մարզերում ունեցած կառույցներով. ««Հայկական վերածնունդ» կուսակցությունը Վանաձորում հաջողության հասավ թեկնածուի շնորհիվ: Կարծում եմ, որ Վանաձորում ստացած ձայները պայմանավորված էր անձով:  Իսկ Գյումրիում իրենք ունեն լավ, հզոր կառույցներ, Շիրակի մարզում իրենք ավանդաբար կայուն ընտրազանգված են ունեցել: Որոշ կուսակցություններ էլ, որոնք շատ բարձր պլանկա էին դրել,  տեսանք, որ թե Գյումրիում, եւ թե Վանաձորում ոչ բավարար ձայն հավաքեցին»:

Հարցին՝ արդյոք նկատի ունի ՀԱԿ եւ «Քաղաքացիական պայմանագիր» կուսակցությունները, որոնք հոկտեմբերի 2-ի ՏԻՄ ընտրություններին չկարողացան հաղթահարել նվազագույն շեմը, եւ արդյոք այս ընտրություններից հետո կարելի է խոսել ՀԱԿ-ի եւ նրա առաջնորդ Լեւոն Տեր-Պետրոսյանի քաղաքական մահվան մասին, Էդուարդ Շարմազանովը նշեց, որ չի ուզում կոնկրետ գնահատականներ տալ.  «Ես չեմ ուզում գնահատական տալ, չեմ կարծում, որ ճիշտ կլինի առաջին նախագահի քաղաքական մոտալուտ մահվան վերաբերյալ գնահատականներ հնչեցնել: Արդյունքներն ու փաստերը կան, թող վերլուծություններ անեն»:

Անդրադառնալով ընտրակեղծիքների վերաբերյալ հրապարակումներին եւ ահազանգերին՝ Շարմազանովը նշեց, որ դրանցով զբաղվում են իրավապահները եւ կեղծիքներ եւ ընտրախախտումներ կատարած անձինք, որոնք կբացահայտվեն, կպատժվեն օրենքի ողջ խստությամբ: