Regnum. «Երևանում ծավալվող իրադարձությունների հանդեպ մի շարք ռուսական ԶԼՄ-ների ոչ ադեկվատ արձագանքի մասին»

Հասարակություն 24 Հունիս, 2015 16:15

Ռուսական Regnum լրատվական գործակալությունը քննադատական հոդվածով է հանդես եկել՝ ուղղված ռուսական որոշ ԶԼՄ-ների՝ երևանյան ցույցերի ոչ ադեկվատ լուսաբանման համար։ Ձեզ ենք ներկայացնում հոդվածի ամբողջական թարգմանությունը։

«Երևանում տեղ գտած իրադարձությունները լուսաբանելիս քաղաքական ընդվզման ու «Մայդանի» նշաններ նկատելու փորձերը, հատկապես իրավիճակին հեռվից հետևող ռուսական ԶԼՄ-ների կողմից, հիմարություն են թվում։

Արդեն օրեր շարունակվող բողոքի ակցիայի ժամանակ դեռ չեն եղել քաղաքական կարգախոսներ ու պահանջներ։ Բողոքող երիտասարդություն, իսկ հենց երիտասարդությունն էր կազմում «Ոչ թալանին» շարժման կորիզը, առաջ է քաշել միայն մեկ պահանջ՝ կասեցնել ու չեղարկել ՀԾԿՀ որոշումը, որով էլեկտրաէներգիայի սակագինը օգոստոսի 1-ից պիտի բարձրանա 16%-ով։ Ճիշտ է, ակցիաների ընթացքում արվում էին փորձեր՝ քաղաքական կարգախոսներ ներառելու, բայց դրանք արագ կանխվում էին բողոքի ակցիայի մասնակիցների կողմից։

Ի դեպ, «Ոչ թալանին» շարժման անհաջողությունների պատճառներից մեկը հենց նրանում է, որ նրանց չեն ցանկանում համագործակցել քաղաքական ուժերի հետ, թեկուզ սակագների բարձրացման հարցում։ Օրինակ, համանման «Դեմ եմ» շարժումը հասավ հաջողության կենսաթոշակային բարեփոխումների դեմ իր պայքարում, քանի որ այս հարցում համագործակցում էր քաղաքական կուսակցությունների ու խորհրդարանականների հետ։

Այս առումով առնվազն տարօրինակ են հնչում այնպիսի ձևակերպումներ, ինչպիսին, օրինակ, սա է. «Չարտոնված ցույցի ֆորմալ պատճառ դարձավ կառավարության որոշումը, որով օգոստոսի 1-ից պետք է բարձրանա էլեկտրաէներգիայի սակագինը։ Դրանից օգտվեց ընդդիմությունը, որը կազմակերպեց մի քանի նստացույցեր Երևանում»։ Այս նախադասությունը ռուսական «Առաջին ալիքի» լուրերի թողարկման համար պատրաստված ռեպորտաժից էր՝ նշված թեմայի վերաբերյալ։ Ուրեմն այսպես, ցուցարարների կողքին ընդդիմադիր ուժեր չկային, իսկ պատճառը ոչ թե ֆորմալ էր, այլ շատ էլ մոտիվացված և որ ամենակարևորն է՝ միակն էր։

Անմտություն է նաև ակտիվ երիտասարդությունն «արևմտյան» նկրտումների հետ կապելու փորձը։ Արտաքին կառավարման որևէ նշաններ նման բողոքային շարժումները չեն ունենում։ Ու մի շարք ռուսական ԶԼՄ-ների դիրքորոշումը, որոնք ամեն ինչ մատուցում են սև ու սպիտակի մեջ, հիմարության աստիճան անպատասխանատու է։

Առավել ադեկվատ կերպով այս առնչությամբ արտահայտվել է հրապարակախոս Դենիս Դվորնիկովը ֆեյսբուքյան իր էջում. «Եթե ամեն բողոքի հետևում տեսնեք «ԱՄՆ-ի ձեռքը», ապա կստացվի վատ որակի սև-սպիտակ կինո՝ տխուր վերջաբանով։ Ցանկանում եմ ներողություն խնդրել Երևանի ու ամբողջ Հայաստանի բնակիչներից՝ էլեկտրաէներգիայի սակագնի բարձրացումից քաղաքացիների արդար դժգոհության վերաբերյալ ռուսական ԶԼՄ-ների պարանոիդալ հրապարակումների ու սյուժեների համար»։

Աղբյուրը՝ BlogNews.am