«Ոտքերս թատրոնի էներգիայից թուլանում են». Սոս Ջանիբեկյանը ԱՄՆ-ում կխաղա նոր ներկայացման մեջ

Լife.tert.am-ը գրում է . 

Այս օրերին դերասան Սոս Ջանիբեկյանը գտնվում է ԱՄՆ-ում: Tert.am Life-ը օվկիանոսից այն կողմ կապ է հաստատել Սոսի հետ և պարզել դերասանի ուղևորության նպատակները:

«Այժմ ԱՄՆ-ում եմ, քանի որ հոկտեմբերի 7-ին, Գլենդելում նախատեսված է ներկայացում: Այստեղ կայանալու է ռեժիսոր Վահիկ Փիրհամզեի «Նայիր աչքերիս մեջ» ներկայացման պրեմիերան, որում խաղում են ռեժիսորը, իր կինը՝ Անահիտ Ավանեսյանը, Լուիզա Ներսիսյանը և ես»-, ասաց Սոս Ջանիբեկյանը:

Դերասանն առաջին անգամ է ԱՄՆ-ում  և նախատեսում է հայրենիք վերադառնալ 20 օր հետո: Նահանգների մասին իր տպավորություններով  կիսվել  չի շտապում, քանի որ երկրին ծանոթանալ դեռ չի հասցրել: Սոսը մարմնավորել է հայ տղայի, ով մեկնել է իր ամերիկյան երազանքի հետևից և անօրինական բնակություն հաստատել ԱՄՆ-ում։

Սոսը երբեք չի թաքցրել, որ թատրոնի բեմ բարձրանալը իր մեջ վախեր է առաջացնում, քանի որ թատրոնում փորձը մեծ չէ. «Կա վախ, որ նորից հնարավոր է  բարձրանամ բեմ ու թատրոնի էներգիայից ոտքերս թուլանան: Բոլոր դեպքերում ամեն ինչ անում եմ, որ ինձ բեմում ավելի վստահ զգամ ու արդարացնեմ հանդիսատեսի սպասելիքները»:

Սոսը կարծում է, որ  ամենակարևորն այն է, որ վստահում է ռեժիսորին,-«Շատ ուրախ եմ, որ հնարավորություն ունեցա ճանաչել և աշխատել Վահիկ Փիրհամզեի հետ: Նրա ցանկությունն այն է, որ չլինի տարանջատում հայերի, սփյուռքահայերի, պարսկահայերի միջև: Բոլորին մեկտեղել, մատուցել հումոր, ուրախություն ու դրական էմոցիա: Շատ կարճ ժամանակ է մնացել, աշխատում ենք խիստ գրաֆիկով, որ հասցնենք»-, Tert.am Life-ի հետ զրույցում պատմեց Սոս Ջանիբեկյանը:

Հարցազրույցը՝ ԱՆահիտ Կասամանյանի