Հանրային ակցիաների մեկ այլ էֆեկտի մասին

Մովսես Դեմիրճյանը ֆեյսբուքյան իր էջում գրում է .

Արդեն մի քանի օր է, ինչ ընթանում է հոսանքի թանկացման դեմ կազմակերպված քաղաքացիական նախաձեռնությունը, որը հանրության լայն շրջանակներում մեծ աջակցություն է ստացել: Իրոք, խիստ ողջունելի է հենց քաղաքացիական, ոչ թե քաղաքական-կուսակցական հիմքի վրա հանրությանը համախմբող այս շարժումը, որի նպատակը համահունչ է բոլորիս շահերին: 

Ստացվում է այնպես, որ շարժման մի կողմում քաղ. ակտիվիստներն են` իրենց հռետորաբանությամբ, մյուս կողմում` իշխանությունն ու պետությունը: Եվ կա վտանգ, որ իշխանությունների կամ ընդամենը նրանց կոնկրետ մեկ որոշման դեմ պայքարը վերածվի պետության կամ կոնկրետ անձի դեմ պայքարի, մինչդեռ բուն նպատակը դա չէ: Նույնիսկ եթե չվերածվի իրականում` փողոցում, ապա բավական է, որ պայքարն այդպես ներկայացնեն լրատվամիջոցները, և պայքարն այլ երանգավորում ու թիրախ կունենա: 
Այս երկու օրվա ընթացքում միջազգային ԶԼՄ- ներից մի քանիսը բավականին ակտիվ անդրադարձել են Երևանում տեղի ունեցող իրադարձություններին, և հիմնականում` սխալ: Թե այդ սխալը կատարվել է զուտ ինֆորմացիա չունենալու պատճառով, թե միտումնավոր` դժվար է ասել, բայց այն, որ ակցիայի կազմակերպիչները հնարավորություն են տվել սխալ մեկնաբանելու իրենց գործողությունները` փաստ է: Դրան նպաստել են և անորոշ վարքը, և բանակցելուց հրաժարվելը, ինչի արդյունքում պայքարը դառնում է ընդամենը պահանջ, և քաղաքական բնույթի հայտարարությունները, որոնք քաղաքացիական նախաձեռնության հետ սկզբում կապ չունեին: Մասնավորապես, դրսի մամուլում ակտռվ շրջանառվում է Հայաստանում ուկրաինական սցենարով մայդանի հնարավորության հարցը, որը որքան էլ հեռու է մեր իրականությունից, այնքան էլ կողմնորոշիչ` դրսում շատ ներդրողների, վերլուծաբանների և շարքային մարդկանց համար: 

Դեռ հայտնի չէ, թե ինչպես կավարտվի պայքարը և ով ինչ կշահի, բայց արդեն պարզ է, որ եթե քաղաքացիական նախաձեռնության ակտիվիստները չհստակեցնեն պահանջի իրական հասցեատիրոջը և դրա մասին չհայտարարեն հրապարակավ, ապա նրանց լռությունը կամ անորոշ ու անիրականանալի պահանջները այլոց կողմից բազմապիսի մեկնաբանություններ անելու հնարավորություն կտան: