Զոհված զինծառայողների 52 երեխաներ դրամական օգնություն ստացան (լուսանկարներ)

NEWS.am-ի բարեգործական ակցիայի շրջանակում հավաքված գումարը, ինչպես նախատեսվում էր, բաժանվել է ապրիլյան պատերազմում զոհված զինծառայողների այն ընտանիքներին, որտեղ անչափահաս երեխաներ կան։

Ակցիայի կազմակերպիչներն այցելել են Արցախում եւ Հայաստանում ապրող բոլոր ընտանիքներին եւ հանձնել գումարը. 1 եւ 2 երեխա ունեցող 14 ընտանիք ստացել է 100 հազարական դրամ, 3 երեխա ունեցող 5 ընտանիք՝ 150 հազարական դրամ, եւ 4 եւ ավելի երեխա ունեցող 3 ընտանիք՝ 250 հազարական դրամ: Հավաքված 3 մլն 122 հազար դրամից 2 մլն 900 հազարը բաժանվել է 22 ընտանիքների միջեւ, որտեղ կա 52 երեխա։ Մնացած 200 հազար դրամը ակցիայի կազմակերպիչները որոշել են տրամադրել քառօրյա պատերազմում վիրավորված 2 երեխաների ընտանիքներին:

Այցելությունների ընթացքում NEWS.am-ի աշխատակիցներն ականատես են եղել, որ զոհված զինծառայողների ընտանիքների մեծ մասն ապրում է ծանր սոցիալական պայմաններում եւ նրանց խնդիրներին անդրադարձել առանձին հրապարակումներով։

• Կորստից ծնված ապրելու ուժը 
• 9-ամյա Աստղիկը՝ մանկական երեւակայության ուժով վերակենդանացած հոր դուստրը 
• Ապրիլյան պատերազմում զոհված ավագ լեյտենանտի կինն ու երկու մանկահասակ երեխաները սեփական տանիք չունեն 
• Զոհված զինծառայողի 19–ամյա այրին երկու զավակներին մեծացնում է գոյություն չունեցող տանը 
• Արցախյան գյուղի ծանր առօրյան. ի՞նչ է սպասվում զոհված սերժանտի այրուն եւ երեք երեխաներին 
• Զինծառայողի այրին շուտով աղջիկ կունենա. բնակարանի հարցը դեռ լուծված չէ 
• Արցախյան գյուղն ապրում է պատերազմական ժամանակների օրենքներով 

Հիշեցնենք, որ զոհված զինծառայողների ընտանիքներին օգնելու նպատակովNEWS.am-ը Երեխաների պաշտպանության տոնին ընդառաջ կազմակերպել էր իր պաղպաղակի բարեգործական վաճառք: Մեկ օրվա ակցիայի ընթացքում հավաքվել էր 2 մլն 450 հազար դրամ։ Այնուհետեւ Կրթության ազգային ինստիտուտի փոխտնօրեն, Երևանի ավագանու «Բարեւ Երեւան» խմբակցության անդամ Անահիտ Բախշյանի աջակցությամբ բացված հաշվեհամարներին փոխանցվել էր 530 հազար դրամ եւ 300 ԱՄՆ դոլար: