«Կարևոր է, որ նոր վարչապետի օրոք գողությունների փաստը ոչ միայն արձանագրվի, այլև մեղավորները պատժվեն»

Կապված մտահոգությունների հետ, թե Կարեն Կարապետյանի կողմից կառավարության անձնակազմի փոփոխությունները և նոր նշանակումները վաղ թե ուշ հանգեցնելու են իշխող կուսակցության և վարչապետի միջև հակասությունների և բախման,  քաղաքագետ Գագիկ Համբարյանը Shabat.am-ի հետ զրույցում նշեց . «Ժամանակին, ինչպես գիտնեք, Կարեն Կարապետյանը բավականին բարձր պաշտոն էր զբաղեցնում. նա Երևանի քաղաքապետն էր: Հիմա նա երկրորդ անգամ «նույն գետն» է մտնում, և համոզված եմ, որ մինչև, այսպես կոչված, քարտ բլանշ, այսինք՝ թույլտվություն չունենար այսպիսի գործողություններ կատարելու համար, նա երբևէ այդ պաշտոնը չէր ստանձնի: Ստացվում է, որ վարչապետին թույլատրվել է համապատասխան ոլորտների մասով բավականին ազատ կադրային քաղաքականություն վարել: Հենց սրանով է պայմանավորված հանգամանքը, որ Կարեն Կարապետյանը ձերբազատվում է նախ և առաջ ոչ պրոֆեսիոնալ և դեմագոգ ՀՀԿ-ական այն կուսակցականներից, որոնք ստանձնել էին նախարարների պաշտոնները: Այսպիսով, Կարեն Կարապետյանն իր թիմն է ստեղծում, որպեսզի տնտեսական քաղաքականություն իրականացնելիս ինքը լիովին պատասխանատու լինի իր գործերի համար: Հնարավոր չէ ստանձնել վարչապետի պաշտոնը և աշխատել բացարձակ անծանոթ և գործից անտեղյակ մարդկանց հետ: Մյուս կողմից էլ   նկատեմ, որ ՀՀԿ-ն այսօր հասարակության կողմից չընդունված, վարկաբեկված կուսակցություն է, և նոր վարչապետը ճիշտ կվարվի իրեն այդ կուսակցության ներկայացուցիչներից հեռու պահելով»:

Վարչապետի կողմից իրականացվող կադրային փոփոխությունները, ըստ քաղաքագետի, հեռանկարում կարող են դրական նշանակություն ունենալ. «Կարապետյանը ձևավորում է տեխնոկրատների կառավարություն՝ գերադասելով գործ ունենալ պրոֆեսիոնալների հետ: Մենք միշտ սովոր ենք եղել, որ մեր նախարարները քաղաքական դեմքեր են եղել, որոնք կարողանալով քաղաքականության մեջ գործունեություն ծավալել միևնույն ժամանակ կարող են այլ ոլորտներում բացարձակ անտեղյակ լինել: Այդ պատճառով էլ Հայաստանի տնտեսությունը խայտառակ վիճակում է: Մնում է հուսալ, որ  Կարապետյանին կհաջողվի մաքրել այն ավգյան ախոռները, որոնք նրան թողեցին Տիգրան Սարգսյանը և Հովիկ Աբրահամյանը»:

Անդրադառնալով վարչապետի կողմից կառավարությունում «պրիմիտիվ գողության» մասին հայտարարությանը՝  քաղաքագետը նշում է, որ գողությունների փաստը ոչ միայն պետք է արձանագրվի, այլև հարկավոր է հետևողական լինել, որպեսզի մեղավորները գտնվեն, և հասցված վնասը վերականգնվի. «Ես դրական եմ վերաբերում վարչապետի կողմից այս հարցը բարձրացնելուն, սակայն չէի ուզենա, որ Կարապետյանը վարվեր Իշխան Զաքարյանի նման. ինչպես գիտեք, Վերահսկիչ պալատի նախագահն էլ միլիարդավոր դրամների և միլիոնավոր դոլարների չափով պետբյուջեին վնաս հասցնող հանցագործություններ է բացահայտում: Սակայն խնդիրը կայանում է նրանում, թե այդ հանցագործության հեղինակներն ի՞նչ պատիժ են կրում, և այդ վնասների որքա՞ն մասն է ետ վերադարձվում պետական բյուջե, արդյո՞ք «խոշոր շնաձկները» պատիժ կրու՞մ են իրենց արարքների համար, թե՞ «մանր ձկներն» են իրենց վրա վերցնում ամբողջ մեղքը՝ դառնալով քավության նոխազ»: