«Գազի սակագնի նվազեցումն այսօր իրականություն դառնալու անհրաժեշտ հիմքերն ունի»

Նորանշանակ վարչապետ Կարեն Կարապետյանի առաջին հանձնարարականներից մեկը գազի սակագնի նվազեցման ուղղությամբ աշխատելուն էր վերաբերում: Թե ինչպիսի՞ նախադրյալներ և հիմքեր կան գազի գնի նվազեցման համար տնտեսագետ Վահագն Խաչատրյանը Shabat.am-ի հետ զրույցում պարզաբանում է. «Մենք հաշվարկներ ենք կատարել, որոնց համաձայն Հայաստանի սպառողների համար գազի սակագինը իջեցնելու հնարավորություն կա: Այս մասին խոսվել է նաև Ազգային Ժողովի ամբիոնից` Հայ Ազգային Կոնգրեսի ներկայացուցիչների կողմից: Մեր ուսումնասիրությունները ցույց են տվել, որ գազի սակագինը քաղաքացիների համար կարող 20-25 տոկոսով իջնել: Դա նորություն չէ և ակնհայտ է 2-2.5 տարիների ընթացքում, երբ համաշխարհային շուկայում գազի գնի անկում է տեղի ունենում: Որպես օրիանկ նշեմ, որ Ռուսական «Գազպրոմը» Գերմանիային գազ վաճառում էր 170 դոլարով 1000խմ-ի դիմաց այն դեպքում, երբ նախկինում վաճառում էր 350-400 դոլարով: Ակնհայտ էր, որ Հայռուսգազարդը պետք է գազի գինը իջեցներ, սակայն դա տեղի չունեցավ, և մեր քաղաքացիների հաշվին ընկերությունը ստանում էին գերշահույթ:

Եթե հաշվի առնենք, որ տեղի է ունեցել ռուսական ռուբլու արժեզրկում դոլարի նկատմամբ, իսկ մենք գազի դիմաց վճարում ենք դոլարով, ապա այս դեպքում ևս մեր հնարավորություններն ավելի մեծ են գազի սակագինը քաղաքացիների համար իջեցնելու հարցում»:

Վարչապետի կողմից այս հարցին անդրադառնալու պատճառը տնտեսագետն այսպես է բացատրում. «Հիմա նոր մարդ է եկել և պետք է ինչ-որ ձևով շահի ժողովրդի համակրանքը, որի համար հայտարարվում է, որ պետք է փորձեն իջեցնել գազի և էլեկտրաէներգիայի սակագինը: Սա շատ բնական է, առավել ևս այնպիսի իշխանության համար, որն այսօր հեղինակություն, մարդկանց կողմից վստահություն չունի: Այս ձևով իշխանությունը կարող է որոշակի սպասելիքներ առաջացնել մարդկանց մոտ, որ նոր կառավարությունը կկարողանա իջեցնել գազի սակագինը»:

Տնտեսագիտական հաշվարկների համաձայն Հայաստանում գազի գնի նվազումը հեռանկարում իրական է, սակայն արդյո՞ք նման բան տեղի կունենա` հաշվի առնելով մեր իրականության մեջ առկա իրավիճակը.  «Հանձնարարականը, որը տրվել է վարչապետի կողմից եղել է սպառողների շատ ավելի նեղ շրջանակների համար, մասնավորապես անապահով խավի բնակչության և բիզնես շրջանակների գործունեության խթանման նպատակով»,- նշում է Խաչատրյանը,- « Սա արդեն խոսում է այն մասին, որ խնդիրներ են առաջացել ամբողջ ազգաբնակչության համար գազի սակագնի նվազման գործում, քանի որ սակագնի նվազումը հնարավոր է իրականացնել բոլոր քաղաքացիների համար»:

Խաչատրյանը ևս մեկ բաց է նկատում վարչապետի հանձնարարության մեջ. «Գազի և էլեկտրաէներգիայի սակագնի նվազումը, ըստ վարչապետի, պետք է իրականացվի գազի և էլեկտրաէներգիայի մատակարարումն իրականացնող ձեռնարկությունների հաշվին: Դա ինձ համար զարմանալի է, քանի որ երկու կազմակերպություններն էլ չեն ենթարկվում Հայաստանի Հանրապետությանը. դրանցից մեկը ռուսական կորպորացիա է, իսկ մյուսը`մասնավոր: Դժվար թե այդ ընկերությունները համաձայնեն, որ սակագնի նվազումը տեղի ունենա իրենց և ոչ թե պետբյուջեի հաշվին: Այս առումով մնում է միայն սպասել, թե վերջնական ինչպիսի որոշում կընդունվի»: