Վարուժան Ավետիսյանը դատը համարում է բեմադրություն

«Սասնա ծռեր» խմբի անդամ Վարուժան Ավետիսյանը չէր ցանկացել  ներկա գտնվել իր կալանքի երկարացման  գործով  դատական նիստին:

«Նա  համարում է ուղղակի բեմադրություն եւ չի ցանկանում ներկա գտնվել եւ որեւիցե կերպ մասնակից դառնալ այդ բեմադրությանը»,- ասաց պաշտպան Արա Զաքարյանը:

Փորձաքննության նշանակելու որոշմանը ծանոթացնելուց  բացի  Վարուժան Ավետիսյանի մասնակցությամբ որեւէ քննչական  գործողություն չի կատարվել:  Դրանց իրականացման համար եւս երկու  ամիս  է անհրաժեշտ։    Արա Զաքարյանի խոսքերով՝ գործի ելքը վաղուց  կանխորոշված էր, քանի որ  դատարանը նույն նյութերի հիման վրա մեկ այլ գործով  նմանատիպ որոշում էր կայացրել

«Այսինքն այդ նյութերին տվել էր գնահատական եւ նման պայմաններում ակնկալել, որ դատարանը Վարուժան Ավետիսյանի մասով տրամագծորեն հակառակ հետեւության կհանգի, առնվազն միամտություն է, սա շատ  լուրջ խնդիր է»,- ասաց պաշտպանը։ Դատարանն ավելի ուշ  երկու ամսով երկարացրեց Վարուժան Ավետիսյանի կալանքը։

Այսօր երկարացվեց նաեւ Սասնա ծռեր  խմբի մյուս անդամ Արամ Հակոբյանի կալանքի ժամկետը:

Վաղը նույն դատարանում նշանակված  է նաեւ Սմբատ Բարսեղյանի գործով դատական նիստը: Նրա եղբայրը, սակայն, խմբի մյուս անդամների գործերով բոլոր նիստերին  դատարանի բակում է  լինում։

« Սասնա ծռերի եւ եղբորս մտադրությունը  նույնն է, ինչ որ իմը,  կամ տան անդամներինը,  կամ հայ ազգինը ,որ ապրենք արժանապատիվ Հայաստանում»,- ասում է նա:

ԵՊՀ ուսանող 23-ամյա Սմբատը ՊՊԾ շենքը գրավելու մասին ոչինչ չի խոսել: Այս օրերի ընթացքում  էլ հարազատները նրա մասին տեղեկություն են իմանում միայն փաստաբանի միջոցով:

Դատարանում վաղը կշարունակվեն  «Սասնա ծռեր» խմբի մյուս անդամների գործով դատական նիստերը՝ կալանքի երկարաձգման հարցով։