ՕԵԿ. Պատմությունը մեզ հնարավորություն է տվել. Հայաստանը պետք է օգտվի տարածաշրջանային իրադարձություններից

Հայաստանը պետք է օգտվի Հարավային Կովկասում եւ Մերձավոր Արեւելքում տեղի ունեցող փոփոխություններից: Այս մասին NEWS.am-ին ասաց «Օրինաց երկիր» խմբակցության քարտուղար Մհեր Շահգելդյանը:

Նրա խոսքով՝ անկախության 25-ամյակը, բնականաբար, այն տարեդարձն է, որը մտորումների եւ վերլուծության տեղիք է տալիս, քանի որ արդեն քառորդ դար շարունակ անկախ պետություն ունենք:

«Այդ քառորդ դարի ընթացքում, բնականաբար, ամենակարեւոր եւ լուրջ ձեռքբերումը անկախությունն է եւ Ղարաբաղյան պատերազմում հաղթանակը: Միեւնույն ժամանակ, ակնհայտ են ներքին եւ արտաքին խնդիրները, որոնք ծառացած են մեր պետության առջեւ: Ներքին խնդիրների եւ մարտահրավերների մեծ մասը, բնականաբար, բխում է կառավարման համակարգից: Ցավոք, այս տարի բախվեցինք Ադրբեջանի սանձազերծած քառօրյա ագրեսիային, որի հետեւանքով զոհեր ունեցանք: Խնդիրներ ի հայտ եկան նաեւ պաշտպանության ոլորտում»,- նշեց Շահգելդյանը:

Երկրում առկա խնդիրներից պատգամավորն առանձնացրեց սոցիալական վիճակը: «Այս տարի տեղի ունեցավ նաեւ Ոստիկանության պահակապարեկայն ծառայության գնդի գրավումը, եւ, ավաղ, կրկին զոհեր գրանցվեցին: Վերլուծությունը ցույց է տալիս, որ բազմաթիվ խնդիրներ կան, եւ այսօր մենք պարտավոր ենք անվտանգության եւ զարգացման քաղաքականությամբ ամրապնդել մեզ տրված անկախությունը: Հակառակ դեպքում կմեծանա արտագաղթը»,- ընդգծեց Մհեր Շահգելդյանը:

Պատգամավորի փոխանցմամբ՝ իրավիճակը սթափ գնահատելով անհրաժեշտ է տեսնել տարածաշրջանում գոյություն ունեցող հնարավորությունները: Շահգելդյանի պարզաբանմամբ՝ նավթի գների անկմանը զուգահեռ սպառազինության համար ավելի մեծ ֆինանսական միջոցներ տրամադրելու Ադրբեջանի հնարավորությունները փոքրանում են:

«Հայ ժողովրդին՝ ինչպես Հայաստանում, այնպես էլ Լեռնային Ղարաբաղում եւ Սփյուռքում, ցանկանում եմ մաղթել ուժ եւ կարողություն, որպեսզի հաղթահարի խնդիրները եւ պահպանի զարգացման այն մեծագույն հնարավորությունը, որը «անկախություն» է կոչվում, որը Ղարաբաղյան հաղթական պատերազմ է կոչվում, սփյուռքի հետ միավորում եւ հայկական գաղափարների առաջմղում է կոչվում: Համոզված եմ, որ պատմությունը մեզ հնարավորություն է ընձեռել: Նաեւ համոզված եմ, որ Հարավային Կովկասում եւ Մերձավոր Արեւելքում  տեղի կունենան եւ արդեն տեղի են ունենում փոփոխություններ, որոնք մենք պետք է կարողանանք հանուն մեր ազգային շահերի օգտագործել: Դրա համար մենք պետք է երկրի ներսում ուժեղ լինենք»,- ամփոփեց Մհեր Շահգելդյանը: