Ազատամարտիկ Խաչիկ Ավետիսյանը հետ է վերադարձրել իր 8 մեդալները

2015-ին Նորք Մարաշի հանցախմբի գործով կալանավորված  ազատամարտիկ, պահեստազորի փոխգնդապետ Խաչիկ Ավետիսյանը այսօր՝ ՀՀ անկախության 25-ամյակի առթիվ բաց նամակով դիմել է նախագահ Սերժ Սարգսյանին:

«Դուք պարգևատրեցիք մի խումբ մարդկանց ( Ս. Կապուտիկյանի հոգուն լույս իջնի): Չմոռացաք նաև ՇՏԱՊ կարգով ինձ «պարգևատրել»: Ձեր հրահանգով` սեպտեմբերի քսանին, մեկ գիշերվա մեջ ՀՀ ԱԱԾ քննչական խումբը, ԱԱԾ Քննչական վարչության պետ, գնդապետ Մ. Համբարձումյանի գլխավորությամբ քրտնաջան աշխատելով, որոշում կայացրեցին, ի հավելումն ՀՀ ՔՕ 223 և 235-րդ հոդվածների, ինձ մեղադրանք առաջադրել նաև 35 – 300 -րդ հոդվածի 1 - ին մասով, որով նախատեսվում է 10 – 15 տարի ազատազրկում:

Իրավաբանները տեղյակ են, որ նշված հոդվածը համաներման մեջ երբևէ չի կարող ընդգրկվել. քայլ ձիով… Ինչևէ, ընդունված կարգ է, որպեսզի պարգևատրված անձը իր շնորհակալությունը հայտնի: Ի պատասխան` ես Ձեզ եմ հանձնում նախկինում ստացած իմ որոշ պարգևներ` թվով ութ մեդալ : Ցավում եմ, որ չեմ կարող Ձեզ հանձնել նաև իմ երեք վիրավորումները մարտի դաշտում, իմ դեգերումները Բաքվի, Կիրովաբադի և Աղդամի բանտերում:

Նաև ցանկանում եմ, որ Դուք իմանաք` կարող եք ինձ ազատությունից զրկել` մի երկու տականքի կեղծ ցուցմունքներով , կարող եք վերջապես ինձ սպանել, բայց իմ ոգին կոտրել` երբեք: Միանալով Սերժ Թանկյանի կոչին`ես ասում եմ ՈՉ համակարգված կոռուպցիային, դատական անհավասարությանը, ոստիկանության դաժանությանը, քաղաքական կողմնակալությանը, անհավասար իրավունքներին, արտագաղթին և ընտրակեղծիքներին:

Հ.Գ. Չեմ հանձնում ԼՂՀ ՄԱՐՏԱԿԱՆ ԽԱՉ շքանշանս, քանի որ այն իրավացիորեն պատկանում է իմ երեք զավակներին, ովքեր արժանիորեն վաստակել են այն»,- իր բաց նամակում ասել է ազատամարտիկ, պահեստազորի փոխգնդապետ Խաչիկ Ավետիսյանը: