Այսօր բոլորիս համար տոն է ու այս տոնի մեջ կա կատարված երազանք. Լևոն Հարությունյան

«Մենք ապրում ենք մեր պապերի երազած անկախ երկրում, բայց ցավոք այսօր մենք ունենք անկախություն, որը գնահատված չէ ու ես շատ եմ ուզում, որ գա մի օր, երբ իսկապես գնահատված լինի մեր ունեցած անկախությունը, իսկ այս օրը յուրաքանչյուր հայի համար իսկապես տոնական լինի: Այսօր բոլորիս համար տոն է ու այս տոնի մեջ կա կատարված երազանք,  ուստի ուզում եմ ի սրտե շնորհավորել բոլորիս եւ ամենակարեւորը խաղաղություն մաղթել»,- Life.panorama.am-ի հետ զրույցում դերասան Լեւոն Հարությունյանն այսպես շնորհավորեց Հայաստանի Հանրապետության անկախության  25-ամյակը:

Լեւոն Հարությունյանը «Չի եղել գիշեր, որ չի լուսացել. ներկայացման գլխավոր դերակատարներից է, որի առաջնախաղը կայացել է երկու օր առաջ: Այս ներկայացումը նվիրված է Անկախության 25-ամյակին, որի բովանդակության հիմքում ընկած է Արցախյան ազատամարտը:

«Այս ներկայացումը պատմում է Արցախյան պատերամզին մասնակցած մեր տղերքի մասին, որի գլխավոր գաղափարը կայանում է նրանում, որ անկախ նրանից, թե կռվին մասնակցած տղերքն այսօր ինչ կարգավիճակում են, նրանց պետք է հարգել ու սիրել, պետք է անընդհատ հիշել նրանց մասին, այլ ոչ թե տարին 1-2 անգամ: Այստեղ կա կռված տղամարդու ցանկություն, ով շատ բան չէր ուզում, ընդամենը հեծանվով հասնել Արցախ ու իր ընկերներին եւ անկախացած հողին նվիրված ընկուզենու ծառ տնկել: Ներկայացման բովանդակության մեջ կա հաղթանակի գաղափարը, իսկ յուրաքանչյուր հաղթանակ ժողովրդի մեջ հավատ է արթնացնում»,- նշեց դերասանը:

Հետաքրքրվելով, թե Լեւոն Հարությունյանը գո՞հ է ներկայացման առաջնախաղից եւ արդյոք հանդիսատեսի շրջանում տեղ է հասել նպատակային հաղորդագրությունը, պատասխանեց.

«Կարծում եմ՝ այո, տեղ է հասել մեր գաղափարը, ու սա ասում եմ ոչ թե իմ, այլ ընկերներիս խաղից ելնելով: Ներկայացման ավարտին հանդիսատեսի մեծ մասը հուզված հեռացավ, իսկ հանդիսատեսին հուզել նշանակում է կատարվել է առաջդ դրած նպատակը»:

Հեղինակ՝ Անուշիկ Մելքոնյան