5,2 մլն դոլար IFAD-ից. Հայաստանի արտահանողներին օգնության նոր ծրագիր

Հայաստանում մեկնարկել է պահածոներ եւ ալկոհոլ արտահանողներին օգնության նոր ծրագիր 5,2 մլն դոլար արժողությամբ: Այդ մասին  NEWS.am-ի թղթակցին հայտնել է Հայաստանում Գյուղի տնտեսական զարգացման հիմնադրամի (FREDA) տնօրեն Ալեքսանդր Քալանթարյանը,  որը կիրականացնի ծրագիրը: 

Այն նախորդի շարունակությունը կդառնա (8 մլն դոլարի) եւ դարձյալ նախատեսում է աջակցել գյուղատնտեսական մթերքի վերամշակմամբ զբաղվող եւ արտահանման ներուժ ունեցող ընկերություններին:  Ինչպես նախկինում, ծրագիրը ֆինանսավորելու է  IFAD-ը  (Գյուղատնտեսության զարգացման միջազգային հիմնադրամը), որը 5,2 մլն դոլար կտրամադրի: Բայց FREDA-ն աշխատում է նաեւ ֆինանսական այլ կազմակերպությունների հետ:  

«Փորձում ենք միասին ներդրումներ անել: Շատ ակտիվորեն աշխատում ենք   «Արմսվիսբանկի» հետ: Կարծում եմ` տեսանելի ապագայում միասին ներդրումներ կանենք երկու ընկերությունում: Իսկ մենք ինքներս արդեն երեք ընկերությունում ներդրում ենք արել», - նշել է նա: Բացի բաժնետիրական ներդրումից, նոր ծրագիրը կօգնի նախապատրաստվել դրան: «Պայմանականորեն մենք դա կոչում ենք քվազի-բաժնետիրական ներդրում: Մենք ընկերությանը վարկ ենք տրամադրում եւ նրան նախապատրաստում ենք կառավարման անհրաժեշտ ստանդարտների:  Որովհետեւ մեր ընկերությունները ոչ միշտ են աուդիտ, ակտիվների գնահատում անցնում, ոչ միշտ են հաշվապահություն վարում ժամանակակից ստանդարտների համապատասխան», - հավելել է Քալանթարյանը:

Երբ ընկերությունը հասնում է «անհրաժեշտ վիճակին», նրան տրված պարտքը վերաձեւակերպվում է որպես մասնաբաժնային մասնակցություն: Արդեն ֆինանսավորում ստացած երեք ընկերություններից մեկը սնկեր է արտադրում, մյուսը` անասնակեր, երրորդը` գինու եւ պահածոների համար ստվարաթղթե տուփեր: FREDA-ն ընկերություններին խթանում է արտադրության մեջ էներգամատակարարում ներդնել, ինչպես նաեւ բազմազան դարձնել արտահանման ուղղությունները:  Նախորդ ծրագրի գործընկերները պահպանել են Ռուսաստանի եւ (պակաս չափով) Ուկրաինայի շուկաները, բայց միաժամանակ կարողացել են իրենց արտադրանքը հասցնել Չեխիայի, Գերմանիայի, ԱՄՆ-ի, Իսրայելի, Լիբանանի, Լատվիայի խանութներ:    

«Մեր ներդրումների վերին շեմը 240 մլն դրամն է (500 հազար դոլարից քիչ ավելի, խմբ.), այսինքն աշխատում ենք մանր եւ միջին ձեռնարկատերերի հետ:  Փաստացիորեն մենք նրանցից հաճախորդներ ենք պատրաստում միջազգային ֆինանսական կազմակերպությունների` EBRD-ի եւ IFC-ի համար (որոնք ֆինանսավորում են առաջարկում արդեն շուկայական պայմաններով, խմբ.): Այդ գումարի կեսը մենք կարող ենք տրամադրել որպես կարճաժամկետ պարտք շրջանառու միջոցների համար: Այն կարող է պետք գալ բերքահավաքի սեզոնին, որովհետեւ ագրարային սեկտորի ընկերությունների մոտ հումքի գնումները սեզոնային են, բայց խոշորները` ամբողջ տարվա ընթացքում», - պարզաբանել է Ալեքսանդր Քալանթարյանը:

Նշենք, որ նախորդ ծրագրի  շրջանակում ինը գործընկեր ձեռնարկությունից հաջող աշխատում է չորսը, շարունակում է աշխատել եւս երկուսը, բայց առանց  FREDA-ի մասնակցության (անհամապատասխան ֆինանսական հաշվարկի պատճառով): Երեքի նկատմամբ սնանկության գործընթաց է իրականացվում: 

«Փորձն աղետալի չէ, բայց տեղ-տեղ բացասական է: Այդ պատճառով այժմ ավելի խստորեն կընտրենք գործընկերներին», - հավաստիացրել է Քալանթարյանը: