Հոգնած ենք եղել, քնել ենք. կուրսանտը դատարանում պատմեց, որ Հայկազի սպանության օրը չի կատարել օրապահի պարտականությունները

Վազգեն Սարգսյանի անվան ռազմական ինստիտուտի կուրսանտ Արտուշ Սիմոնյանը 2015թ. հունվարի 29-ին` կուրսանտ Հայկազ Բարսեղյանի սպանության գիշերը, չի կատարել օրապահի իր պարտականությունները, քանի որ հոգնած է եղել: Այս մասին այսօր` սեպտեմբերի 19-ին, Ավան եւ Նոր-Նորք վարչական շրջանների ընդհանուր իրավասության դատարանում ցուցմունք տալիս ասաց Սիմոնյանը, որը գործում ներգրավված է որպես տուժող:

«Օրապահ եմ եղել երկրորդ հարկում, Հայկազենց սենյակն էլ երրորդ հարկում է: Ես պետք է վաշտի հերթապահի հետ լինեի 2-րդ հարկի միջանցքում, հետեւեի շարժին, կարգուկանոնին, անթույլատրելի բան տեսնելու դեպքում զեկուցեի հերթապահին: Բայց շատ հոգնած էինք, մեր պարտականությունները լրիվ չենք արել»,- ասաց կուրսանտը:

Արտուշ Սիմոնյանը պատմեց, որ ըստ կարգի ինքը եւ այդ օրվա մյուս օրապահը պետք է փոխարինեին իրար յուրաքանչյուր երկու ժամը մեկ անգամ, սակայն, իրենք խախտել են կարգն ու պայմանավորվել, որ իրենցից մեկը կհերթապահի մինչը ժամը երեքը, մյուսը` վեցը:

«Բայց պայմանավորվածի պես էլ չեղավ, շատ խառն էր, գնում էինք քնում էինք, գալիս էինք, գնում էինք լվացվում էինք: Մի քանի րոպե էինք միջանցքում լինում»,- ասաց նա` նշելով, որ իրենց համար նախատեսված վայրում կանգնած լինելու դեպքում կնկատեին, եթե աստիճանների վրա շարժ լիներ:

Դատախազի ու փաստաբանների հարցերին տուժողը մեծամասամբ չպատասխանեց` ասելով, թե չի հիշում: Նա չէր հիշում, թե հատկապես որ ժամերին է արթուն եղել, երբ է գնացել օրապահի պահարանի մոտ, մյուս օրապահն իրեն եկել ու արթնացրել է թե ոչ, ինչու են հենց ակդ օրն այդքան հոգնած եղել:

Արտուշ Սիմոնյանը տուժող է ճանաչվել ամբաստանյալներից Վարազդատ Սաֆարյանի հետ ունեցած կոնֆլիկտի դրվագով, երբ լսարանում նրանց միջեւ քաշքշուք է եղել:

Հիշեցնենք, որ 2015թ. հունվարի 29-ին՝ ժամը 06:35-ի սահմանում Երեւանում տեղակայված ուսումնական զորամասերից մեկի մարզահրապարակում հայտնաբերվել էր նույն զորամասի 1-ին կուրսի ուսանող Հայկազ Արկադիի Բարսեղյանի դին՝ պտտաձողի վրա պարանով կախված վիճակում:

Կուրսանտին դաժանաբար սպանելու, այնուհետեւ կախելու մեջ մեղադրվում են կուրսանտներ Գնել Թևոսյանը, Նորիկ Սահակյանը,Վաչե Սահակյանը և Մովսես Ազարյանը: Նրանց մեղադրանք է առաջադրվել ՔՕ 104-րդ հոդվածի 2-րդ մասի 7-րդ կետով՝ առանձին դաժանությամբ, խուլիգանական դրդումներով սպանություն կատարելու համար: