Ոսկրածուծի դոնորների հայկական ռեեստրում արդեն 28 000 պոտենցիալ դոնոր կա

Ոսկրածուծի դոնորների հայկական ռեեստրում արդեն մոտ   28 000 պոտենցիալ դոնոր է գրանցված: Վերջին 10 տարվա ընթացքում նրանցից 30-ը ցողունային բջիջներ է հանձնել, որոնք փոխպատվաստվել են նրանց հետ համատեղելի մարդկանց, որոնք տառապում են լեյկեմիայով, լեյկոզով կամ արյան այլ չարորակ հիվանդություններով:  

Ոսկրածուծի դոնորների ռեեստրից բժիշկ Միհրան Նազարեթյանը   NEWS.am Medicine-ի թղթակցին պատմել է, որ ռեեստրի մոտակա նպատակն է  30 000 պոտենցիալ դոնոր հավաքել, չէ որ որքան  շատ լինեն նրանք, այնքան մեծ կլինի համապատասխան դոնոր գտնելու եւ ծանր հիվանդությամբ մարդու կյանք փրկելու հավանականությունը:  

Ոսկրածուծի դոնոր դարձած 30 հայերից մեկը Վահեն էր, որը  100 տոկոսով համատեղելի է եղել Իտալիայից աղջկա հետ, որի մոտ սուր լեյկոզ էր հայտնաբերվել` վերջին փուլում:  Այդ նույն օրը, երբ նրան Վահեից վերցրած ցողունային բջիջներ են փոխպատվաստել, աղջիկը ուշքի է եկել, սկսել է խոսել, երգել եւ խաղալ: Այդ փոխպատվաստման շնորհիվ նա ոչ միայն ողջ է մնացել, այլեւ ամբողջությամբ առողջացել է եւ այսօր, մոտ  10 տարի անց, նորմալ կյանքով է ապրում:

Պոտենցիալ դոնոր դառնալ ցանկացողները կարող են դիմել Ոսկրածուծի դոնորների հայկական կենտրոն: Պոտենցիալ դոնոր կարող է դառնալ 18-ից 50 տարեկան առողջ մարդը: Նրանից պահանջվում է ընդամենը 2 մլ արյուն հանձնել տիպավորման համար, եւ նրա վերաբերյալ տվյալները մտցվում են ռեեստր: 

Մի անգամ, եթե աշխարհի որեւէ անկյունում որեւէ հիվանդի ոսկրածուծի ցողունային բջիջների փոխպատվաստում անհրաժեշտ լինի, նրա համար պոտենցիալ դոնորի կփնտրեն ամբողջ աշխարհի ռեեստրներում: Եթե նման դոնոր գտնվի, նրան կառաջարկվի ցողունային բջիջներ հանձնել (դրանք արյունից են վերցվում, ոչ թե ոսկրածուծից, ինչպես ոմանք կարող են մտածել), հետո դրանք կփոխպատվաստվեն հիվանդին եւ գուցե փրկեն նրա կյանքը: 

Հիշեցնենք, որ ցողունային բջիջների փոխպատվաստման միջոցով արյան չարորակ հիվանդությունների բուժման արդյունավետությունը բավականին բարձր է, եթե իհարկե հաջողվում է դոնորի գտնել, որը գենետիկորեն 100 տոկոսով համատեղելի է հիվանդի հետ. միայն այդ դեպքում օրգանիզմը չի վանի փոխպատվաստված բջիջները:  Օրինակ, լեյկոզի դեպքում ցողունային բջիջների փոխպատվաստումից հետո ողջ է մնում հիվանդների  90 տոկոսը: Դա բավականին լուրջ թիվ է, որն  ապացուցում է մեթոդի արդյունավետությունը: