Սվիտալսկի․ Հայաստանում բարեփոխումներ իրականացնել ցանկացող ուժը լեգիտիմության կարիք ունի

Հայաստանն այժմ վճռորոշ ճամփաբաժանի վրա է և երկրին հարկավոր են խորը բարեփոխումներ, սակայն, որևէ քաղաքական ուժ, որը ցանկանում է Հայաստանում բարեփոխումներ իրականացնել, ուժեղ լեգիտիմության կարիք ունի: Այդ մասին «Ազատության» հետ զրույցում ասել է Երևանում ԵՄ դեսպան Պյոտր Սվիտալսկին՝ հավելելով, որ լեգիտիմության լավագույն աղբյուրը այնպիսի ընտրություններն են, որոնք ժողովրդի կողմից կդիտարկվեն որպես ազատ ու արդար:

«Եվ կարծում եմ, որ բոլորն ունեն այն գիտակցումը, որ Հայաստանին պետք են խորը և համապարփակ բարեփոխումներ: Կարող եմ հղում կատարել մի շատ կարևոր հայտարարության, որը վերջերս արել է Հայաստանի նախագահը, ու կարող եմ ասել Ձեզ, որ Եվրամիությունում մենք լիովին կիսում ենք նրա գնահատականը` Հայաստանին անհրաժեշտ են բարեփոխումներ: Եվ մենք պատրաստ ենք աջակցել նրան: Բայց ցանկացած քաղաքական ուժ Հայաստանում, որը ցանկանում է իրականացնել բարեփոխումներ և առաջ տանել երկիրը, կարիք ունի շատ ուժեղ լեգիտիմության: Ցանկացած քաղաքական ուժի համար չկա ավելի լավ լեգիտիմության աղբյուր, քան ընտրությունները, որոնք ժողովրդի կողմից կդիտարկվեն որպես ազատ ու արդար ընտրություններ, որոնք կարտացոլեն բնակչության կամքը»,- ասել է Սվիտալսկին:

Նա ընդգծել է, թե չկա ընտրությունների կատարյալ մի մոդել: «Ժողովրդավարությունը որևէ երկրում կատարյալ չէ: Մշտապես կլինեն հիասթափություններ և դժգոհություններ, որ ընտրական համակարգի այս կամ այն տարրը որոշակի իմաստով անաչառ չէ կամ որ չի բավարարում այս կամ այն խմբի շահերը: Բայց այս ամենը մի կողմ դնելով, կարծում եմ, որ իմանալով վերջին տարիների ընտրությունների պատմությունը և դրանց շուրջ եղած վիճարկումները, միջազգային դիտորդների քննադատական հայտարարությունները և այլն, մենք կարծում ենք, որ Հայաստանն այժմ ունի իրական շանս՝ ցույց տալու, որ քաղաքական մշակույթը Հայաստանում ուժեղ է, հասուն է, որ հանուն երկրի ապագայի հայաստանցիները կարող են կառուցել Հայաստանի ռազմավարական նպատակներին ծառայող շատ ուժեղ կոնսենսուսային հենք: Եվ մեր` Եվրամիության շահը Հայաստանում շատ պարզ ու թափանցիկ է: Մենք ցանկանում ենք, որ Հայաստանը զարգացում ապրի, ուզում ենք, որ Հայաստանը բարգավաճի, ուզում ենք, որ Հայաստանը իսկապես ապահովի հնարավորինս լավագույն պայմանները սեփական զարգացման համար: Սա մեր ռազմավարական նպատակն է մեր հարևանությունում: Հայաստանը կարևոր գործընկեր է մեզ համար, ու մենք ասում ենք, որ գաղտնի օրակարգ չունենք: Մենք միայն ցանկանում ենք կայուն, ճկուն և բարգավաճ Հայաստան»:

Խոսելով վարչապետի պաշտոնում Կարեն Կարապետյանի նշանակման մասին՝ Սվիտալսկին ասել է. «Հուսով ենք, որ նոր կառավարությունը կշարունակի այս նախաձեռնությունները՝ հատկապես լավ կառավարման և հակակոռուպցիոն պայքարի հետ կապված: Համոզված եմ՝ դա այդպես կլինի: Մենք՝ Եվրամիությունը, պատրաստ է աջակցել նոր կառավարությանը բարեփոխումների իրականացման գործում: Հուսով ենք, որ մեր աջակցությունը օգտակար կլինի նոր կառավարության համար: Մենք պատրաստ ենք: Մենք ցանկանում ենք շատ սերտ աշխատել նոր կառավարության հետ և մաղթում ենք նոր կառավարությանը, նոր վարչապետին ամենայն հաջողություն Հայաստանում դրական փոփոխություններին հասնելու համար»: