Վանաձորում ինքնաբացարկ դեռեւս հայտնել է մեկ թեկնածու

Հանրապետության 3-րդ քաղաքի ՏԻՄ ընտրություններին կմասնակցի 8 կուսակցության 325 թեկնածու

Հոկտեմբերի 2-ին Վանաձորում կայանալիք ՏԻՄ ընտրություններին մասնակցելու հայտ է ներկայացրել 8 կուսակցություն:

Համախմբում կուսակցությունը կներկայանա 33 թեկնածուով, ցանկը գլխավորում է Վահան Ղույումչյանը: Բարգավաճ Հայաստան կուսակցությունը ներկայացրել է 28 հոգուց բաղկացած ցանկ, ցուցակը գլխավորում է Այծեմնիկ Օհանյանը: Լուսավոր Հայաստան կուսակցությունը կներկայանա 35 հոգուց կազմված խմբով, ընտրացուցակը գլխավորում է Քրիստ Մարուքյանը: Հայ Հեղափոխական դաշնակցություն կուսակցությունն այս ընտրություններում կներկայանա 38 թեկնածուով, ցանկը գլխավորում է Նելսոն Մամուլյանը: Հայկական վերածնունդ կուսակցությունը` 70 թեկնածու ունի, առաջին համարը Արկադի Փելեշյանն է, Քաղաքացիական պայմանագիր կուսակցությունը`  21 թեկնածուով, ցուցակը գլխավորում է Արամ Խաչատրյանը, ՀՀԿ-ն ներկայացրել է 68 հոգուց բաղկացած ցուցակ, որը գլխավորում է Մամիկոն Ասլանյանը: Հայ ազգային կոնգրեսն էլ այս ընտրություններին ներկայացել է 33 հոգանոց խմբով, այն գլխավորում է Ռուբեն Ոսկանյանը: Սակայն օրեր առաջ այս կուսակցության 19-րդ համարը զբաղեցնող թեկնածու Նիկոլայ Ամիրբեկյանն ինքնաբացարկ է հայտնել:

Թիվ 30 ընտրատարածքային ընտրական հանձնաժողովի նախագահ Տիգրան Պապանյանն ասում է, որ դեռեւս միայն ՀԱԿ կուսակցությունն է ներկայացրել թեկնածուի ինքնաբացարկ: «Արդեն հանձնաժողովը որոշումը կայացրել է, ինքնաբացարկն ընդունվել է: Ինքնաբացարկի վերջնաժամկետը ընտրությունից 10 օր առաջ է: Այս պահին ինքնաբացարկ կարող են հայտնել նաեւ կուսակցությունները, դրա համար մենք հերթականություն էլ դեռ չենք սահմանել, թե քվեարթերթիկում ինչ հերթականություն է լինելու»,-ասում է հանձնաժողովի նախագահը: