Օպերային նոր թատերաշրջանը մեկնարկում է սեպտեմբերի 15-ից

Սեպտեմբերի 15-ին, ժամը՝ 18:00-ին, տեղի կունենա Ա. Սպենդիարյանի անվան օպերայի եւ բալետի ազգային ակադեմիական թատրոնի 83-րդ թատերաշրջանի հանդիսավոր բացումը: Թատրոնի նախասրահում նախատեսված են մի շարք միջոցառումներ հանդիսականների համար. մշտական խաղացանկում առկա բոլոր ներկայացումների դերակատարները կդիմավորեն այցելուներին, նախատեսված է նաեւ ցուցադրություն, ինչպես նաեւ այլ անակնկալներ:

Ա. Սպենդիարյանի անվան օպերայի եւ բալետի ազգային ակադեմիական թատրոնից  NEWS.am-ին հայտնում են, որ ավանդույթի համաձայն թատերաշրջանի առաջին ներկայացումը կլինի Ա. Տիգրանյանի «Անուշ» օպերան: Գլխավոր դերերում հանդես կգան Անահիտ Մխիթարյանը /ՀՀ վաստ. արտիստ/, Պերճ Քարազյանը /ՀՀ վաստ. արտիստ/, Գեւորգ Հակոբյանը /ՀՀ վաստ. արտիստ/:

Ընթացիկ թատերաշրջանում մինչեւ այս տաեվերջ նախատեսված են Ջ. Պուչինիի «Տոսկա» օպերայի եւ Ա. Խաչատրյանի «Դիմակահանդես» բալետի պրեմիերաները:

Սեպտեմբերի 22-ին տեղի կունենա ՀՀ անկախության 25-ամյակին նվիրված «Երեք պրեմիերա» խորագրով համերգային հանդիսավոր երեկոն:

Հոկտեմբերին նախատեսված է թատրոնի գեղարվեստական ղեկավար, ՌԴ վաստ. արտիստ Կոնստանտին Օրբելյանի ղեկավարությամբ համերգային երեկո՝ սիմֆոնիկ նվագախմբի եւ երգչախմբի մասնակցությամբ:

Ա. Սպենդիարյանի անվան օպերայի եւ բալետի առաջատար մենապարուհի, ՀՀ վաստ. արտիստ Ժակլին Սարխոշյանի հրաժեշտի երեկոն մեծ բեմին տեղի կունենա հոկտեմբերի 1-ին:

Հոկտեմբերից դեկտեմբեր ամիսներին նախատեսված են Ա. Սպենդիարյանի, Տ. Սազանդարյանի, Պ. Լիսիցյանի, Մ. Մարտիրոսյանի եւ Մ. Երկաթի հոբելյաական երեկոները:

Նոր թատերաշրջանի ընթացքում Ա. Սպենդիարյանի անվան օպերայի եւ բալետի ազգային ակադեմիական թատրոնում կկազմակերպվեն նաեւ ճանաչողական շրջայցեր հանրապետության դպրոցականների համար: