«Հայի աչքեր» նախագիծը հինգ ընտանիքի հարց է լուծել (լուսանկարներ)

«Հայի աչքեր» հեռուստամարաթոնի առաջին հաղորդման ընթացքում ներկայացվեցին սոցիալապես անապահով ընտանիքների խնդիրները, իսկ արդեն երկրորդ հաղորդման ժամանակ լուծվեցին այդ խնդիրները, իսկ հերոսները տուն վերադարձան դրական էմոցիաներով: Նախագծի հեղինակ և վարող Դիանա Գրիգորյանը Blognews.am–ի հետ զրույցում պատմել է ընտանիքների երջանկության մասին:

«Աննկարագրելի ուրախություն է, որը ես նրանց մեջ էլ զգացի: Դա այն պահն էր, երբ հույզերը խեղդում են քեզ, և չես կարողանում արտահայտվել: Մինչ նկարահման ավարտը մնացին, հետո սկսվեց ողջագուրման պահը: Այն պահին, երբ ես հանձնեցի նրանց գումարը, մարդիկ պարզապես չէին հավատում, գիտեք՝ դա բնական է, մարդիկ տարիներ շարունակ աղետից հետո ապրել են երազանքներով և չեն մտածել, որ գուցե ինչ-որ մի օր լուսավոր դուռ բացվի նրանց համար»:

Դիանան շնորհակալ է բոլոր նրանց, ովքեր նպաստել են այդ ընտանիքների ուրախությանը. «Կան հոգով հարուստներ և շատ փող ունեցող աղքատներ, սա արդեն լուսահոգի Քըրք Քըրքոյանի արտահայտություններից է, որը ես մեջբերեցի հաղորդման ընթացքում: Շատ մարդիկ կան, որ ահռելի քանակով փող ունեն, բայց նրանք շատ աղքատ մարդիկ են: Ես մեծ հույս ունեմ, որ դեռ կշարունակենք ուրախացնել շատ ընտանիքների, իհարկե նախատեսված չէ, որ նախագիծն ամեն շաբաթ պետք է եթերում լինի, և հաջորդ շաբաթ էլ լուծումներ տանք: Այս ընտանիքների ուրախությունը պարտավորեցնում է մեզ, որ անդրադառնանք նմանատիպ ընտանիքների, բայց պարտադիր լուծման պայմանով»:

Դիանան հենց հաղորդման սկզբում նշել էր, որ շատ դռներ էին թակել, և գտնվել էին բարի մարդիկ, ովքեր աջակցել են ընտանիքներին. «Մենք յուրաքանչյուր ընտանիքի տվեցինք երկու միլիոն դրամ, կես միլիոն դրամ տվեցինք մեկ ուրիշ ընտանիքի, ամերիկացի բարերարներից մեկն էլ կես միլիոն դրամ փոխանցեց մեկ ուրիշ ընտանիքի: Դրան գումարած՝ փոքրիկ երեխայի համար օրթոպեդիկ սայլակ էին տրամադրել, մարզասարք տրամադրեցինք Սահակին, ով առաջին կարգի հաշմանդամ է, նա տեղաշարժվելու խնդիր ունի, մայրն էլ խնդրել էր մարզասարք տրամադրել, որ կարողանա շարժվել, և լուսաբանեցինք Հասմիկի խնդիրը, ում  պետք է մի ընտանիք, ով  պատրաստ է նրան ընդունել»:

Զրույցի վերջում Դիանան նշեց՝ ուրախ է, որ նախագիծը կայացավ, և իրենց առջև դրված նպատակը կարողացան լուծել. «Մենք շարունակելու ենք հետամուտ լինեն բոլոր այն ընտանիքներին խնդիրներին, ովքեր ունեն մեր աջակցության կարիքը: Շատ եմ ցանկանում, որ բարի գաղափարի շուրջ մարդկանց համախմբվածությունն ավելի շոշափելի լինի»:

Նյութը՝ Սիրանուշ Գրիգորյանի 

Աղբյուրը՝ BlogNews.am