Ֆաինա Հարությունյանը՝ դստեր և նոր հավաքածուի մասին

Life.panorama.am-ը գրում է . 

Ֆաինա Հարությունյանի և նրա ամուսնու` օպերատոր Արտյոմ Աբովյանի առաջնեկի` Նիկայի, ծնունդի մասին արդեն պատմել ենք: Դստեր լույս աշխարհ գալուց գրեթե մեկ ամիս անց Life.panorama.am-ը կապ հաստատեց Ֆաինա Հարությունյանի հետ`ճշտելու որպես նորաթուխ մայրիկ նրա զգացողությունների մասին և թե արդյոք նա արդեն վերադարձել է իր բնականոն աշխատանքին:

«Ասեմ, որ դստերս ծնունդից հետո չեմ դադարեցրել աշխատանքս: Ճիշտ է, ժամանակային առումով ավելի քիչ եմ աշխատանքային վայրում լինում, բայց շարունակում եմ ակտիվ աշխատել»,- մեզ հետ զրույցում պատմեց դիզայները:

Խոսելով իր` մայր լինելու կարգավիճակի մասին, Ֆաինան ասաց, որ երեխայի խնամքիի հետ կապված առանձնապես դժվարություններ չի ունենում, իսկ եթե, այնուամենայնիվ, որոշակի խնդիրներ լինում են, ապա իրեն օգնության են հասնում իր ընտանիքի անդամները, համապատասխան մասնագետները և բժիշկները, որոնց հետ դիզայներն անընդհատ կապի մեջ է լինում:

«Դեռ չեմ նեղվում: Գիտեք, ես այն տարիքում եմ, որ պետք է երեխա ունենայի»,- ժպիտով նշեց Ֆաինան` հավելելով, որ եթե ավելի փոքր տարիքում երեխա ունենար, գուցե իր համար ավելի դժվար լիներ:

«Ինձ մոտ ամեն ինչ շարունակում է իր ճիշտ տեղում լինել` ընտանիքս, բալիկս, աշխատանքս: Կարծում եմ, որ կարողանում եմ ամենը, ինչպես որ հարկն է, կառավարել և ամեն ինչին ուշադրություն դարձնել ու հետևել»,- իր խոսքը շարունակեց Ֆաինա Հարությունյանը:

Անդրադառնալով դստեր` ծնողներին նմանությանը, դիզայները նշեց.

«Ճիշտ է,Նիկան դեռ շատ փոքրիկ է, բայց բոլորն են ասում, որ նա արտաքին նմանություն ունի ամուսնուս` Արտյոմին»:

Ինչ վերաբերում է ստեղծագործական գործունեությանը, Ֆաինա Հարությունյանը տեղեկացրեց, որ իր նոր հավաքածուն արդեն պատրաստ է:

 Ի դեպ` դիզայների նոր հավաքածուն այսօր ներկայացվելու է «Oriflame» ապրանքանիշի կողմից կազմակերպված ցուցադրության ժամանակ:

«Այսօր կլինի ցուցադրությունը, իսկ արդեն երկուշաբթի հագուստը կհանվի վաճառքի: Առհասարակ, նշեմ, որ ես իմ կողքին հավաքված շատ լավ թիմ ունեմ, ինչի շնորհիվ մենք երբեք չենք դադարում ակտիվ աշխատել: Եթե անգամ ես նրանց հետ չեմ լինում, նրանք շարունակում են նույն պատասխանատվությամբ աշխատել,- Life.panorama.am-ի հետ զրույցում իր խոսքը եզրափակեց դիզայներ Ֆաինա Հարությունյանը:

Հեղինակ` Անուշիկ Մելքոնյան